NUPELA Metropoliten Suprintenden bilong Nesenel Kepital Distrik, Gideon Ikumu i tok planti awenes i mas kamap insait long Lo na Jastis Sekta long mekim ol pipel i luksave long ol wok bilong ol polis, ol rot bilong mekim wokpainimaut, sanap long kot na ol sistem bilong kot.

Ekting Sif Suprintenden Ikumu i tok ol pipel long komyuniti i mas luksave olsem ol pasin tumbuna na kastom bilong baim kompensesen em bilong kamapim bel kol insait long komyuniti. Tasol wokpainimaut bilong polis na ol kriminel jastis sistem i mas i go het yet na no gat wanpela samting bai stopim, pasim o i mas wankain olsem em.

Em i tok man, meri o pikinini husat i kamapim hevi mas sanap long kot na kot yet bai mekimsave long en.

Em i mekim ol dispela toktok bihain long ol famili na wanlain bilong ol manmeri na pikinini husat kisim bagarap long hevi bilong polis kar na PMV bas bam long trefik lait long rot klostu long Haus Palamen long Waigani i askim polis dipatmen long givim kompensesen long ol.

Em i tok kain ol askim na strongpela toktok i ken kam aninit long pret na fos na dispela em ol kriminel pasin.

Wanpela Toyota Lenkrusa we wanpela polisman i bin draivim i bam wantaim wanpela PMV bas, wanpela bebi i dai na 9-pela manmeri na pikinini i kisim bagarap. Metsup Ikumu i tok ol i arestim na sasim polisman pinis bai jastis sistem i mekimsave long en.

Em i tok dispela hevi we i kamap i givim bikpela lewa pen long ol famili na wanpisin bilong ol lain kisim bagarap tasol sapos ol i laikim kompensesen ol i ken askim insurens kampani bilong ol kar.