GAVMAN i mas kamapim wanpela moa yunivesiti long kamapim inap tisa, wanpela opisa i tok.

Jonathan Kena, wanpela senia tisa long Holy Spirit Sekenderi Skul long Bogia, Madang Provins i tokim Wantok Niuspepa long dispela wik long taim moa long 700,000 sumatin long praimeri na sekenderi skul i statim 2021 Ekedemik Skul Yia long neks wik Mande.

Em i tok olgeta yia planti pikinini na skul i wok long kamap na namba bilong ol tisa i mas bungim dispela namba bilong ol pikinini na skul i sot.

Em i tok bikos long hevi bilong sot bilong tisa, planti moa salens i wok long bungim save ol pikinini i kisim na wok bai mekim long bihain taim.

Em i tok ol tisa i save bungim ol sumatin moa long mak ol i mas tis na dispela i ken bagarapim kwaliti bilong kisim save.

Em i tok tu olsem kwaliti bilong edukesen i ken stap daunbilo bikos long coronavirus (COVID-19).

Kena husat i tis long Brugam Sekenderi long Maprik na Wereili Haiskul long Drekikir (Is Sepik) na Daru Sekenderi (Westen) i tokaut tasol long ol salens i stap long sekenderi skul level tasol i no inap tokaut long praimeri level.

“Namba bilong ol tisa i kamaut long Goroka Yunivesiti i sot long namba bilong ol pikinini na ol skul i kamap,” Kena i tok.

“Gavman i mas kamapim narapela yunivesiti long ol em i ken kamapim inap tisa long bungim namba bilong ol skul na pikinini.

Kena i tok bikos long COVID-19 SOE na lokdaun, Holy Spirit Sekenderi skul long las yia i kisim ol Gret 10 na 12 sumatin tasol.

Em i tok dispela yia ol bai bungim ol Gret 9 na 11 bilong las yia wantaim ol sumatin bilong dispela yia.

Em i tok dispela bai lukim wanpela klasrum bai gat 60 i go long 70 sumatin.

Em i tok sapos dispela i wankain long ol arapela skul long kantri, dispela bai givim hevi long rot bilong lain na kamapim divelopmen long bihain taim.

“Dispela i bai givim hevi long tisa na moa yet ol sumatin long kisim gutpela save.

“Tisa bai sotwin long tis na sumatin i no inap lain gut.”

Kena i tok bihainim askim bilong gavman, Holy Spirit Sekenderi i no inap long rausim ol sumatin husat i no baim skul fi.

Tasol em i tok em wok bilong papamama long baim skul fi olsem pikinini i ken kisim save.

Paul Zuvani i raitim