LAS wik Bogenvil Referendum Projek long PNG Nesenel Risets Institut (PNGNRI) i lonsim tupela nupela ripot bilong en long Bogenvil.

Dispela em i ripot namba 8 na 9 bilong ol risets wok NRI i wokim long Bogenvil. Ripot namba 8 i lukluk long bildim institusen bilong Bogenvil bihain long referendum. Na ripot namba 9 em i lukluk long mekim moa mani bilong gavman bilong Bogenvil.

Profesa Cheryl Saunders na Dokta Anna Dziedzic bilong Melbourne University i bin karimaut risets wok bilong bildim institusen. Dispela ripot i mekim sampela bikpela askim olsem; rilesensip bilong Bogenvil aninit long self diteminsen bai i luk olsem wanem? Na wanem kain ol senis insait long ol institusen i mas kamap na wanem mak bilong taim ol i nidim long mekim dispela wok i kamap.

Long ripot namba 9 Profesa Satish Chand, Profesa Ronald Duncan na Dokta Theodore Levantis i bin karimaut ol wok risets. Dispela risets i bin lukluk long ol ples we mani bai i go aut long en (ekspenditsa) na ol rot we mani bai i kam insait long en (revenyu). Em i toktok tu long ol arapela rot bilong mekim mani olsem takis.

Bikpela hap toktok bilong dispela tupela ripotol risetsa i mekim pinis i go long ol stekolda long wanpela zoom konprens. Dispela em long kisim tingting bilong ol stekolda. Ol vidio bilong dispela konprens i stap long intanet long websait bilong NRI long dispela adres: pngnri.org na tu long ol PNGNRI sosel midia platfom.