OPIS bilong PNG Ilektoral Komisin i tok ol i redi long kaunim gen ol vot bilong Kandep ileksen.

Ekting Ilektoral Komisina, Simon Sinai i tok opis bilong em i kisim tasol K5 milien long K6 milien em opis bilong em bin i askim long em.

Em i tok opis bilong em i kisim ol balot pepa i go pinis long Wabag polis stesin.

Sinai i tok em i toktok wantaim Hailans Rijonal Polis Komanda, Joseph Tondop pinis long givim sekyuriti long taim bilong rikaun.

Opis bilong em nau bai kisim ol balot pepa i go long Kundiawa, Simbu Provins na kaunim ol.

Reveren Tom Sine bai go pas olsem Ritening Opisa na Westen Hailans Ileksen Menesa Philip Telape na Simbu Ileksen Menesa Antonia Nilkare bai stap olsem ol asisten ileksen ritening opisa.

“Mipela i bin askim long kisim K6 milien tasol Treseri Dipatmen i givim mipela K5 milien tasol.

“Mipela bai kisim ol balot pepa i go long Kundiawa na kaunim ol long dispela wik.”

Sinai i tok Opis bilong em i mas kaunim ol vot na tokaut long risalt bipo long 19 Februeri, 2021 olsem oda bilong Kot i tok.

Olpela memba bilong Kandep, Don Polye i kisim “sitting” Memba, Alfred anase i go long Kot-bilong-Dispiutet Riten na Kot i givim oda long kaunim gen ol vot.