MOA long 3000 manmeri husat i wokim haus na sindaun long graun bilong Evanjelikol Luteran Sios (ELC-PNG) long Nagada long not kos rot (NCR) long Madang em polis i rausim ol stat long las wik Fonde.

Planti bilong ol manmeri i bin kirap nogut taim polis go wantaim ol buldoza masin na rausim ol haus na ol diwai na kokonas long posen 69 .

Planti lain manmeri i stap long posen70 we i go daun long nambis sait eria arere long ELC-PNG Kristen Pres. Tude nogat moa manmeri i stap long dispela hap.

Polis tasol i wok long go kam na sekim stap bilong ol manmeri.

Polis i bin go pastaim long posen 69 na bihain i go long posen 70 na posen 78.

Dispela eviksen wok i kamap bihainim Kot Oda em Evanjelikol Luteran Sios (ELC-PNG) i bin kisim long rausim ol ilegal setela.

Wanpela polis mobail skwat bilong Lae, Morobe Provins i bin go long Madang na wok klostu wantaim Madang polis long karimaut dispela wok.

Het Bisop bilong ELC-PNG, Dokta Jack Urame i bin kamaut long midia na i tok olsem misin i bin givim inap taim long ol lain husat i sindaun long Nagada graun long lusim dispela eria.

Urame i tok ol i bin givim ol inap long Disemba 2020 long lusim Nagada.

Misin i bin go long Kot na i winim kot olsem graun i bilong en.

Em i tok Madang provinsal gavman i gat ol plen i stap pinis long divelopim dispela graun olsem pat bilong ekstensen bilong Madang taunsip long Nagada.

Jastis Minista na Madang MP, Bryan Kramer i tok dispela eviksen i kamap bikos em graun bilong misin na ELC-PNG husat i gat rait ol long en i winim Kot egensim sampela lokal lain husat i tok ol trupela papa graun na i bringim ol ol autsait lain na salim graun nating long ol manmmeri long sindaun.

Planti bilong dispela ol lain i bilong ol arapela provins.

James G. Kila i raitim