NESENEL Kot long Waigani, Pot Mosbi i tokaut olsem apoinmen bilong David Manning olsem Komisina bilong Polis na Het bilong Dipatmen bilong Polis i no bihainim lo na kot i rausim em long dispela wok.

Kot i tok Manning i no gat digri pepa long teseri institusen we i ken helpim em long holim dispela wok. Digri em i wanpela rikwaimen i stap insait long regulesen bilong Nesenel Ekseketiv Kaunsil (NEC) long wok bilong het bilong dipatmen na edministreta bilong provins.

Nesenel Kot i mekim dispela disisen long las wik Fraide na i givim em 7-de long lusim dispela wok. Tumora, Janueri 29 em namba seven de Manning i mas lusim opis bilong Polis Komisina.

Tasol Minista bilong Jastis na Atoni Jeneral Bryan Kramer i no wanbel long dispela disisen bilong Nesenel Kot.

“Disisen bilong Nesenel Kot em i no fainel, bikos Komisina bilong Polis i gat rait long karim dispela disisen i go long Suprim Kot we tripela man bai sindaun na lukluk gen long dispela disisen,” Minista Krammer i tok.

Minista Krammer i tok taim NEC i kamapim ol regulesen bilong ol manmeri husat i laik kamap het bilong dipatmen na edministreta bilong provins, ol i mas mitim sampela rikwaimen. Tasol em i no ting dispela em wankain long ol Komisina bilong Polis.

“Sapos NEC i laikim ol Polis Komisina long kam aninit long dispela regulesen ol inap long  putim antap long ol arapela 6-pela Polis komisina husat i bin holim dispela wok long 2003 i kam inap nau.

“Taim NEC i kamapim dispela regulesen long 2003, no gat wanpela bilong ol 6-pela Polis Komisina i bin gat digri long teseri institusen,” Minista Kramer i tok.

Em i tok, Peter Aigilo tasol long ol 23 Polis Komisina long 1945 i kam inap nau, i gat digri pepa. Tasol Peter Aigilo i bin stap Polis Komisina long 1997 i go long 1999 na dispela taim regulesen bilong NEC i no bin kamap yet. Tasol bihain long regulesen i kamap long 2003 em 6-pela komisina bilong polis i no gat digri long en i bin holim wok.

“Olsem na mi no ting NEC i laikim apoinmen bilong Polis Komisina bai stap aninit long dispela regulesen. Na mi no ting tu olsem dispela ol evidens i go kamap long kot long helpim Nesenel Kot long mekim disisen ol i mekim pinis

“O ating ol lain mekim ol dispela regulesen i no tokaut klia taim ol i raitim,” Minista Kramer i tok.

Tasol em i tok, NEC i ken yusim konstitusenel pawa bilong en long stretim gen ol sampela samting we i no klia insait long dispela regulesen.

Rebecca Negere i raitim