PAPUA Niugini Ilektoral Komisin i askim ol manmeri long no ken kempen hariap long wanpela ileksen.

Em i tok i tambu long kempen bilong 2022 Jeneral Ileksen o long ol arapela ileksen olsem bai-ileksen bilong Mosbi-Not-Wes.

“Ol kendidet i kempen long ol ileksen bilong demokresi gavman long wol, dispela bai kamap bihain long ilektoral opis bilong ol i givim aut ol rit,” Komisin i tok.

“Kempen hariap bipo long ilektoral opis i givim ol rit inap lukim yu i gat tok long brukim lo.

“Yu no mas kempen na givim aut ol kain kain samting long grisim laik bilong ol manmeri long vot long yu.

“Dispela em yu brukim lo aninit long tok bilong braiberi na tu ileksen i no fri na fea.”

Komisin i askim ol manmeri long ripot long ol lain husat i kempen hariap olsem em i ken save na givim tok lukaut na pasim ol.

Em i tok ol lain husat i mekim olsem inap kamap long kot aninit long Kot-ov-Disputet Riten sapos ol i win.

Long wankain taim, PNG Ilektoral Komisin i plen long holim Mosbi Not-Wes bai ileksen long Februeri o Mas.

Dispela bai kamap bihain  long Sir Mekere Morauta husat i bin memba bilong Mosbi Not-Wes i dai long mun Desemba, 2020.

Sir Mekere i bin winim dispela sia long 2017 Jenerel Ileksen.

Eking Ilektoral Komisina, Simon Sinai i tok opis bilong em bai tokaut gut long program bilong ileksen long bihain taim liklik.

Anna Kavana Bais, Seketeri bilong Komyuniti Divelopmen, Meri na Yut long dispela wik i tokaut long resis long dispela bai-ileksen.

Em i risain tu long wok bilong em.

Holim ileksen long wanpela open ilektorel i save kost bikpela mani olsem K8 milien i go long K15 milien.

Sapos gavman i gat mani, dispela bai orait tasol sapos nogat, dispela bai bungim salens bilong holim ileksen.