BOGENVIL rijonal ileksen kaun i no stat yet.

Provinsal Ritening Opisa, Jimmy Alwyin i tok vot long Sentral Bogenvil na sampela hap bilong Saut Bogenvil i no bin kamap long las wik Trinde na sampela de bihain.

Em i tok dispela em bikos de i no bin gutpela we ren i bin kam.

Em i tok Not Bogenvil tasol i kamapim gut wan-de poling long las wik we i bihainim plen bilong PNG Ilektoral Komisin.

Em i tok wantaim dispela ol opisal i mas kisim trening pastaim long wok bilong kaun bipo long kaun i kamap.

Alwyin i tok, moa yet, Komisin i mas kisim olgeta balot bokis bilong kaun i go long ples bilong kaun bipo long wok bilong kaun i ken go het.

Provinsel ilektoral opis i no kisim yet tu ol balot bokis long ol ailan na ol atol.

Em i tok namba bilong ol lain manmeri long vot i no gutpela tu.

Em i tok no gat planti manmeri i kamap long vot.

Em i tok Komisin i gat nem bilong ol 200,000 manmeri husat inap vot.

I bin gat 410 poling tim we dispela i lukim 120 tim i stap long Saut Bogenvil, Not Bogenvil (172) na Sentral (118).

Taim provinsal ilektoral opis i kisim olgeta balot bokis bilong vot, praimeri kaun bai kamap long ol komyuniti asembli na ol elimenesen kaun bai kamap long rijonal ilektoral opis long Hutjena Sekenderi Skul Hol long Buka.

Alwyin i tok wanpela wik bilong ileksen i pinis na i gat tupela (2-pela) wik tasol i stap bipo long kaun i pinis na opis bilong em bai i tokaut long wining kendidet.

Simon Soheke Asisten Provinsal Ritening Opisa i helpim long ranim dispela ileksen.

Bihain long kaun na dikleresen, Ilektoral Komisin bai kisim ol rit i go bek long Gavman Haus, Konedobu long 19 Februeri.

Bogenvil sia i bin stap nating bihain long pastaim rijonal memba Joe Lera i risain long resis long sia bilong Atonomus Bogenvil Gavman Presiden namel long las yia.

Sikispela kendidet i resis long dispela sia. Dispela ol kendidet em Simon Dumarinu, Llane Munau, wanpela meri kendidet tasol, Peter Lemay Tsiamalili Jnr, Albert Punghau, pastaim memba bilong Bogenvil Haus ov Ripresentetiv, Peter Manuka na Ian Michael Mapya.

Alex Munme i raitim