I GAT sas bilong K50 long manmeri i tromoi pipia nating long Goroka taun.

Goroka Taun Atoriti wantaim Goroka Eben Lokal Level Gavman i kamapim dispela sas bihain long manmeri i no soim pasin bilong lukautim ples na stap helti.

Memba bilong Goroka, Aiye Tambua i givim dispela oda long Goroka Taun Atoriti long klinim taun.

Dispela i lukim Goroka Eben Lokal Level Gavman i kisim ol yangpela long mekim wok bilong klinim taun.

Wok bilong klinim ples i stat long Goroka Eben Wod 4 LLG eria na i go long Taun Maket, Wes na Not Goroka.

Taun Atoriti menesa Harold Abori i tok, ogenaisesen bilong em i givim tok orait long ol yut long lukautim taun.

“Mipela i givim dispela wok long ol yut, long wanem, ol i no gat ol wok long mekim,” em i tok.

“Dispela long lukim ol i no stap nating na mekim ol samting we i no stret na i brukim lo.

“Mipela i givim ol atoriti long sasim ol manmeri K20 i go long K50 long husat i tromoi pipia long taun.”

Konrol Apaks, Goroka Taun Yut lida i tok ol i helpim LLG long klinim taun bikos ol pipia i bagarapim gut nem bilong taun.

“As tingting bilong mipela ol yut em long kamapim gutpela na klinpela taun,” em i tok.

“Dispela yia mipela i amamas long patnasip wantaim ol lain husat i stap long atoriti na ol lain husat i wok long ranim bisnis long taun long lukluk na strongim pasin bilong klinim taun,” Apaks i tok.

GULLG na TaunAatoriti i givim K10,000, Isten Hailans Provinsal Gavman i givim K2000 na bisnis meri Grace Kaupa husat i bin givim K500.

Mista Tambua i bin givim bikpela oda long ol manmeri i mas kilim ol enimal i raun nating long Goroka taun.

Dispela ol enimal em ol dok, pik, meme, sipsip na bulmakau.

Em i mekim dispela tok long las wik long taim em i givim long Goroka taun atoriti long klinim taun, moa yet long taun i kisim gen gut nem bilong em.

Mista Tambua i laik wok bung wantaim Goroka Taun Eben Lokal Level Gavman Presiden, Harold Abori na ol kaunsil bilong em wantaim ol lokol manmeri.

Tupela lida i givim dispela tok lukaut long NBC redio bihain long planti ripot i kamap long sosel media olsem ol enimal i wok long raun lus nating long taun.

“Tok lukaut i go aut nau long yupela ol papa na mama bilong ol enimal long wokim ol banis na putim ol enimal bilong yupela insait.

“Sapos yupela i no inap long mekim olsem na larim enimal bilong yupela i ran nating long taun, polis na ol lain husat i stap long atoriti  i ken kilim ol,” tupela lida i tok.

Tambua i tok tu long ol liklik strit maket na infomol sekta bisnis we ol i wok long kamap bikpela long Goroka taun em opis bilong em na Goroka Eben LLG na taun atoriti bai kisim i go long Asaroiufa hauslain we i stap insait yet long baundri bilong Goroka taun.

“Nupela yia em i kamap pinis long mipela i laik stretim gut ol samting long Goroka taun.

Sape Metta i raitim

“Goroka taun i wanpela long dispela ol samting, long wanem, taim taun i kamap klin na nais, bai yumi i ken lukim ol lokal na intenesenel turis na ol arapela man, meri na pikinini bilong ol arapela senta i ken amamas long pulim lain i kam na raun long taun bilong yumi,” Tambua i tok.

Em i tok long lukluk bilong taun nau em i olsem maket ples bilong salim buai, ol seken han klos na ol arapela moa maket na stua samting we em i no luk gutpela insait long taun.

“Olsem na long dispela as opis bilong em na opis bilong taun atoriti bai muvim dispela ol strit sels na infomol sekta bisnis lain i go daun long Asaroiufa haus lain.

Taun menesa Harold Abori i tok em bai wok wantaim lokol Memba Tambua long kamap wantaim dispela tingting long dispela mun i pinis.

“Opis bilong Goroka Eben LLG na taun atoriti bai wok wantaim Tambua long dispela samting we bai i ken lukim Goroka taun i kisim bek gut nem bilong em,” Abori i tok.