TUPELA memba bilong polis Mobail Skwat 14 bilong Goroka husat nau i stap wok long Madang i bin holimpas na bringim tripela bikhet man husat i save kamapim planti bikhet pasin na stil long ol komyuniti long Siar plantesin klostu long Madang las wik.

Ol komyuniti long hap i save bungim planti hevi na bikhet pasin long han bilong dispela ol grup man husat i save dring na mekim hevi.

Wanpela lapun papa husat i bin laik bringim skul fi mani bilong pikinini bilong em i go putim long benk em ol dispela lain bikhet man i stilim long em. Ol i stilim samting olsem K1,700 bilong pikinini man bilong dispela lapun papa.

Long Tunde apinun pikinini man bilong em i bin go long toktok long ol dispela lain husat i stap klostu long mausrot long Siar arere long RD Tuna Fektori, tasol ol i spak na paitim em.

Long Trinde moning dispela seim grup bikhet man i sanap long rot long Siar na hensapim ol wokmanmeri bilong RD Tuna husat i laik wokbaut i go long wok. Ol i mekim kainkain pasin i go na ol sampela gutpela yut long komyuniti i bungim tingting na mekim grup pait long ol na holimpasim ol na ol i ringim polis. Laki tru ol lain bilong MS 14 aninit long Noten Mobail Grup (NMG) i mekim eskot long bas bilong Ramu NiCo (MCC) long dispela taim long eria i bin go na helpim komyuniti na holimpas na bringim tripela memba bilong grup em husat i save kamapim planti hevi na bikhet pasin i go long Jomba polis stesin las wik.

Ol komyuniti long Siar i no amamas long kain pasin sampela ol lain bilong narapela ples olsem Ramu husat i kisim blok long olpela Siar plantesin i save mekim. Ol yut bilong ol setelmen long hap i save spak na holim naip na sanap long rot na mekim holdap long ol manmeri husat i rent long Siar ples na ol wokmanmeri bilong RD Tuna.

James G. Kila i raitim