MEMBA bilong Mosbi Saut na Minista bilong Hausing, Justin Tkatchengko i bai baim ol polis kar bilong ilektoret bilong en long stretim hevi bilong lo na oda na apim sevis bilong polis long ilektoret bilong en, Polis Komisina David Manning i tok.

“Long sait bilong operesen, Stesin ov Ekselens program i wok long kamap gut. Nau em Memba bilong Mosbi Saut Justin Tkatchengko bai baim ol nupela polis kar bilong ilektoret bilong en.

“I bin i gat wanpela o tupela polis kar we ol i baim aninit long dispela program i bin stap insait long taim nogut, tasol dispela bai no inap long stopim mipela long karimaut dispela program,” Komisina Manning i tok.

Mista Tkatchengko i laik mekim dispela bikos em i go insait long stesin ov ekselens program we bipo Minista bilong Polis na nau Minista bilong Jastis na Atoni Jeneral Bryan Kramer i kamapim long en. Bikpela tingting bilong dispela program em long apim sevis bilong polis long wan wan distrik na provins.

Madang Disitrik em i namba wan ilektoret long bihainim dispela program na Oro provins em namba tu long i go insait long dispela program. Gavana bilong Oro provins Gary Jufa i givim wanpela K1 milien sek mani long Komisina Manning long baim 12-pela nupela polis kar long apim sevis bilong polis long Oro na stretim hevi bilong lo na oda tu.

Mosbi Saut em i namba 3 long kantri long kisim dispela program. Minista bilong JAG, Bryan Kramer, man husat i kamapim dispela program na putim long plua bilong palamen i singaut long ol arapela memba bilong palamen long kisim dispela program na apim sevis bilong polis insait long wan wan ilektoret na provins bilong ol.

Rebecca Negere iraitim