POLIS Komisina David Manning i tok em i laik apim mak bilong sevis bilong polis long kantri maski wanpela kot keis nau i stap long kot i salensim wokmak bilong en.

“Mi bai no inap long wari o tingting planti. Bai yumi brukim dispela bris taim yumi go klostu long en. Tasol long nau yet, mi gat wokmak long lukautim ol pipel bilong kantri na lidim Royal Papua Niugini Konstabulari long inapim wokmak bilong en long mekim kantri i stap seif,” Komisina Manning i tok.

Manning i tok, taim em bin kisim opis olsem Komisina, em i bin kamapim sampela ol tingting long operesen na edministretiv sait bilong RPNGC long apim sevis bilong polis.

Em i tok lo na oda em i bikpela samting long gavman olsem na Praim Minista James Marape i wok klostu wantaim Minista bilong Polis Wiliam Onguglo na em yet long apim polis fos.

“Mipela i tingting planti long gutpela laip bilong ol memba bilong mipela bipo na nau na i bin kamapim sampela tingting long lukluk long dispela. Mak bilong gutpela laip bilong ol wokmanmeri i save helpim ol long mekim wok bilong ol, olsem na mipela i laik strongim gutpela laip bilong ol wantaim gutpela pe na ol arapela samting na tu stretim laip na medikol insurens bilong ol.

“Mipela i laik lukluk long wanpela program bilong tok gutbai long ol memba husat i bai pinis wok. Dispela program bai lukluk long namba bilong krismas ol i sevim, wok ol i mekim, na gutpela disaplin rekot bilong ol.

“Long las yia, gavman i bin helpim long pinisim gutpela namba bilong ol memba long wok. Dispela em i bin namba wan taim bilong konstabulari. Dispela i mekim sampela spes, posisen, na risos i stap nating long arapela wanwok i ken i go na kisim na yusim,” Komisina Manning i tok.

Em i tok moa olsem Praim Minista James Marape i mekim klia pinis olsem em i laik sapotim konstabulari o polis fos. Tasol em i laik lukim bikhet pasin bilong ol polis i pinis.