BOROKO Trefik, Sinia Inspekta Joseph Salle i tok Trefik Opis i nidim helpim.

Na ol i nidim wokbung bilong olgeta long daunim hevi bilong trefik long komyuniti.

Em i tok, em i tru olsem planti trefik lait i bagarap tasol ol i nogat inap trefik opisa long kontrolim trefik long Nesenel Kepital Distrik (NCD).

“Taim i gat pawa blekaut, mipela i save salim ol opisa bilong mipela long ol dabol lein na intaseksen poin long lukautim trefik long ol dispela hap. Tasol namba bilong mipela ol trefik opisa i no planti. Mipela i olsem 56-pela tasol. Mipela i skelim dispela 56 i go i kam na givim wan wan wokmak long mipela na ol lain bilong lukautim trefik i no inap. Mipela i gat bikpela nid long ol trefik opisa long rispon long trefik lait hevi na ol arapela trefik hevi,” Sinia Inspekta Salle i tok.

Em i tok moa olsem Trefik Opis i gat bikpela nid long wokbung wantaim ol stekholda na skelim infomesen i go i kam.

“I mas i gat wanpela rot we mipela i ken salim infomesen i go i kam long ol stekholda kwiktaim. Taim trefik lait i bagarap ol pipel i save ringim mipela. Sapos i gat gutpela kodinesen na komyunikesen namel long enjiniaring dipatmen long NCDC na mipela, bai mipela toksave kwiktaim long ol na ol i ken toksave long konstraksen kampani husat i lukautim ol trefik lait na bai ol i ken i go na stretim na hevi bai pinis, tasol mipela i no gat gutpela kodinesen,” Inspekta Salle i tok

Em i mekim dispela tok long bekim askim bilong Wantok Niuspepa long olsem wanem na planti trefik lait long NCD i no wok na tu ol PMV i no bihainim stret rot bilong ol.

Dispela askim i kamap bihainim wanpela hevi we i bin kamap long rot na trefik i stap klostu long Palamen Haus long Pot Mosbi.

Wanpela yangpela meri i bin lusim laip bilong em long dispela taim na faivpela i kisim bikpela bagarap taim PMV bas ol i stap insait long en i ran i kam long rot we em i no inap long ran long en na wanpela 10-sita lenkrusa i ran i kam bamim dispela PMV. Wanpela polis man i bin spak na draivim dispela lenkrusa.

Dispela hevi i kamap bikos trefik lait i no wok, na nogat trefik opisa long kontrolim trefik long dispela hap na ol draiva i paul spit tasol na bam na kamapim hevi.

Wanpela wokpainimaut tu i soim olsem long 17 trefik lait long NCD, 11 i no wok gut o i bagarap. Dispela em i mak nogut bikos namba bilong ol manmeri na pikinini na namba bilong ol kar tu long NCD i go bikpela.

Rebecca Negere i raitim