DEPUTI lida bilong People’s National Congress (PNC) Pati na Memba bilong Yangoru-Sausia i tokaut long Tunde dispela wik olsem em i risain long PNC Pati.

Maru i bin kamap memba bilong palamen long 2012 olsem wanpela independen kendidet na bihain em i joinim PNC Pati. Em i bin stap strong wantaim PNC na sapotim gut olgeta wok bilong pati inap dispela wik em i risain.

Em i tok bikpela tenkyu long pati lida Peter O’Neill long bilip long lidasip bilong em na givim em wok olsem Minista bilong Komes, Tred na Indastri long 2012-2017 na bihain makim em i kamap minista bilong Nesenel Plening na Monitaring long 2017-2019. Em i tok tenkyu tu long Mista O’Neill i makim em i kamap deputi pati lida.

Aninit long PNC pati Maru i tok planti gutpela samting i bin kamap.

“PNC i gat ol gutpela polisi we i helpim long groim ikonomi bilong kantri, i mekim senis long laip bilong ol pipel na wokim planti infrastaksa divelopmen winim tru ol arapela taim long histori bilong PNG.

“Tuisen-Fi-Fri polisi bilong pati i givim sans long planti sumatin long go long skul.

“Aninit long PNC tu ol Distrik Divelopmen Atoriti i kamap. Dispela I helpim ol distrik olsem Yangoru-Sausia long senisim pes bilong distrik wantaim ol invesmen long edukesen, helt, wara saplai, rurel pawa, lo na oda, telekomyunikesen long lukim ol distrik i pulim investmen groim komyuniti, Maru i tok.

Maru i lusim pati wantaim planti tok tenkyu.

Em i tok wantaim ol ekspiriens bilong em, em I bilip em na ol arapela lida i ken senisim PNG, taim ol i ken senisim ol distrik.

“PNG i nidim lidasip we i gat klia gol na ajenda long draivim senis wantaim ol samting tru tru i kamap,” Maru i tok.

Em i tok long nau em bai i no kalap i go long gavman tasol em bai i sindaun long namel bens. Em i luk fowot long helpim long stiaim divelopmen bilong Papua Niugini.

Rosa Koian i raitim