MEMBA bilong Pomio Elias Kapavore i askim Gavana bilong Is Niu Briten, Nakikus Konga na ENB provisel gavman long helpim distrik bilong em.

Em i tok provinsal gavman i save kisim takis long ol bisnis long distrik bilong em tasol i no save helpim gut distrik bilong em.

Kapavore i mekim dispela singaut long taim ol i opim nupela Ilugi bris na 7-Mail rot insait long Sinivit LLG las wik.

Gavana Konga na Provinsel Edministreta Wilson Matava i bin stap long dispela bung na harim wari na singaut bilong Kapavore.

Kapovore i tok sapos provinsal gavman i kisim sampela takis mani long ol bisnis haus orait em i mas givim helpim long wok divelopmen bilong Pomio.

Em i tok Pomio distrik i baim wanpela sip long mani mak olsem K5 milien we i no kisim helpim i kam long ENB provinsel edministresen.

Tasol maski long dispela, sip i wok long baim takis i go long provinsal gavman.

Kapavore i tok taim distrik i wokim bris  na 7-kilomita rot long mani mak bilong K2.3 milien, i no gat sapot i kam long  ENB provinsel edministresen.
Em i tok yumi wanpela provins tasol na yumi i mas wok bung wantaim long kirapim wok divelopmen long kisim gut sevis i go long ol rurel manmeri.

Em i tok yumi mas senis na distrik i mas senis tu long lukim divelopmen i kam long mipela.

Em i tok tu olsem ol i no laik long i gat hevi long ol dispela samting, bikos wok nau i stap long han bilong provinsel gavman long helpim.

Long wankain, taim Memba i singaut i go long manmeri bilong Pomio long no ken sindaun tasol na wetim sevis i go long ol.

Em i askim ol long yusim lek, han na mekim wok.

Em i tok ol i mas wok hat long kisim ol kes krop bilong ol i go long Kokopo olsem ol i ken salim na kisim mani bilong ol.

Michael Novingu i raitim