MEMBA bilong Goroka, Aiye Tambua i givim bikpela oda nau long ol manmeri i mas kilim ol enimal i raun nating long Goroka taun, Isten Hailans.

Dispela ol enimal em ol dok, pik, meme, sipsip na bulmakau.

Em i mekim dispela tok long las wik long taim em i givim long Goroka taun atoriti long klinim taun, moa yet long taun i kisim gen gut nem bilong em.

Mista Tambua i laik wok bung wantaim Goroka Taun Eben Lokol Level Gavman Presiden, Harold Abori na ol kaunsil bilong em wantaim ol lokol manmeri.

Tupela lida i mekim dispela ol tok lukaut long lokol NBC redio bihain long long ol lukim planti ripot i kamap long sosol media long ol enimal i wok long raun lus long taun.

“Tok lukaut i go aut nau long yupela ol papa na mama bilong ol enimal long wokim ol banis na putim ol enimal bilong yupela insait..

“Sapos yupela i no inap long mekim olsem na larim enimal bilong yupela i ran nating long taun, polis na ol lain husat i stap long atoriti  i ken kilim ol i dai,” tupela lida i tok.

Tambua i tok tu long ol liklik strit maket na infomol sekta bisnis we ol i wok long kamap bikpela long Goroka taun em opis bilong em na Goroka Eben LLG na taun atoriti  bai kisim i go long Asaroiufa hauslain we i stap insait yet long baundri bilong Goroka taun.

“Nupela yia em i kamap pinis long mipela i laik stretim gut planti ol samting long Goroka taun i klinim Goroka taun em i wanpela long dispela ol samting, long wanem, taim taun em i kamap klin na nais, bai yumi i ken lukim ol lokol na intanesenel turis na ol arapela man, meri na pikinini bilong ol arapela senta iken amamas long pulim lain i kam na raun long taun bilong yumi,” Tambua i tok.

Em i tok long lukluk bilong taun nau em i olsem maket ples bilong salim buai, ol seken han klos na ol arapela moa maket na stoa samting we em i no luk gutpela insait long taun.

“Olsem na long dispela as opis bilong em na opis bilong taun atoriti bai muvim dispela ol strit sels na infomol sekta bisnis lain i go daun long Asaroiufa haus lain.

Taun menesa Harold Abori i sapotim toktok bilong Tambua na surukim toktok i go moa na i tok em bai wok wantaim lokol Memba Tambua long kamap wantaim dispela tingting long dispela mun i pinis.

“Opis bilong Goroka Eben LLG na taun atoriti bai wok wantaim Tambua long dispela samting we bai i ken lukim Goroka taun i kamap gut olsem em i bin i stap bipo,” Abori i tok.

Sape Metta i raitim