PRAIM Minista Marape i bin opim prais sapot bilong egrikalsa prodyus long Maprik, Is Sepik long ai bilong moa long 5,000 lokal fama bilong kakao, vanila na kopi las wik.

Is Sepik Gavana Allan Bird, Egrikalsa na Laipstok Minista John Simon, Stet Entaprais Minista William Duma, Edukesen Minista Jimmy Uguro na Defens Minista Solan Mirism i bin stap long dispela bung.

PM Marape i givim strongpela tok long ol pipel bilong Papua Niugini long go insait long ol liklik egrikalsa bisnis. Em i tok prais sapot em bilong helpim ol fama kisim gutpela prais long ol krop bilong ol.

“Mipela bai wokbung wantaim ol provins i laik helpim Nesenel Gavman long strongim ol pipel long mekim moa mani long egrikalsa,” MP Marape i tok.

Em i tok moa olsem, i gat bikpela diman bilong kopi, vanila, kakao, kopra, welpam na raba. Olsem na gavman i laik givim gutpela prais long ol fama bai ol i ken apim prodaksen na dispela bai helpim kantri na ol pipel.

“Wan wan manmeri long kantri i gat graun we ol i ken wokim na planim kes krop. Gavman bai wok klostu wantaim provins na distrik long baim ol krop long hap ol fama i stap. Dispela rot bai kamapim win-win namel long olgeta.”

Em i tok dispela polisi em bilong bringim ol pipel bilong PNG i go long mani ikonomi. Na em i askim strong ol pipel long no ken stap nating tasol i mas kisim egrikalsa SME.