Planti man na meri i hatwok long painim gutpela sindaun tasol ol yet i no gat bel isi.

Christian Revival Crusade (CRC) Pasto John Bouraga i tokim ol pipel bilongTauruba ples long Rigo distrik olsem wari na tingting planti long mani na kago nau i wok long paulim tingting bilong planti man na meri na ol i no gat bel isi.

Pasto Bouraga i tok ol mani man i no save slip gut, wankain olsem ol rabis man i save wari tumas long mani na ol kago na ol i nogat taim long kisim bel isi.

Long olpela testamen King Solomon i toktok long buk Iklesias; “Mi gat olgeta samting mani, kago na planti meri tasol ol i givim mi moa hevi. Tasol long God tasol mi save painim amamas”.

Pasto Bougara i tok manmeri save tingting tumas long mani na kago em samting tru tasol sapos yu dai dispela ol samting em i samting nating tasol.

“Long John 14:6; Jisas i tok mi yet mi rot tru, tok tru na laip olsem na sapos man i laik kisim laip i stap gut tru, ol i mas kam long mi”.

Em i tok baim Baibel na sampela ol Kristen buk tu long em i ken strongim bilip bilong yupela.

Pasto Bougara i tok Jisas i no dai, em i stap laip yet. Dai i nogat strong bilong em, wari na tingting planti i no inap helpim yupela tasol Jisas tasol inap givim yumi bel isi oltaim.

Joseph Dawai i raitim