OL Pabik Sevan i bung long Sir John Guise Indoor Complex Pot Mosbi na holim dedikesen sevis bilong ol long  Mande 18 Janueri 2021.

Praim Minista James Marape i kam long dispela dedikesen wantaim Minista bilong Pablik Sevan Joe Sungi, Minista bilong Riligen, Yut na Komyuniti Divelopmen Wake Goi, Edukesen Minista Jimmy Uguro, Minista bilong Sivil Eviesen Sekie Akisa na  ol pablik sevan insait na aut long kantr i kam tu.

Praim Minista i tok, “Mani mak bilong K5 bilen i save go long pei bilong ol pablik sevan long wanpela yia. Em i olsem hap bilong mani kantri i save kisim long wanpela yia.

“Planti ol pablik sevan i save stap long ol rimot ples bilong dispela kantri ol i no save kisim ol gutpela samting ol pablik sevan long taun i wok long kisim. Namba wan tingting bilong nau gavman i laik mekim ol dispela lain husat i stap long rimot i mas kisim ol dispela sevis tu, Marape i tok.

Minista bilong Pablik sevan Joe Sung i tok, “Ol pablik sevan i mas kam long wok long taim. Em i askim ol pablik sevan long kam long wok long taim na pinis long taim.

“Sapos you no save kam wok long taim na pinis long taim em yu wanpela stilman o stilmeri,” Minista Sungi i tok.

“Yupela i save kisim bikpela mani long pei bilong yupela. Long dispela yupela i mas givim sevis i go bek long ol pipel husat i nidim,” Minista Sungi i tok.

Praim Minista tu i  tok ol i bai mekim sampela wok painimaut long ol pablik sevan husat i gat planti samting olsem kar na mani. Em i tok bai ol i askim ol dispela lain ol i kisim ol dispela samting olsem wanem.

Bikpela namba tru bilong ol pablik sevan i go long dispela dedikesen sevis. Plantihet man na hetmeri bilong ol dipatmen wantaim wan o tupela wokmanmeri  bilong ol i go stap.

Bihain long olgeta program i bin i gat dedikesen prea bilong ol pablik sevan we ol pasta bilong ol kristen sios i prea long ol.

UPNG Jenelis Sumatin Samantha Solomon i raitim