Bogenvil rijonal ileksen kamap gut

BOGENVIL rijonal ileksen i kamap gut long asde. Ol 200,000 manmeri husat inap vot i kisim taim long vot.

I bin gat 410 poling tim we dispela i lukim 120 tim i stap long Saut Bogenvil, Not Bogenvil (172) na Sentral (118).

Praimeri kaun bai kamap long ol komyuniti asembli na ol elimenesen kaun bai kamap long rijonal ilektoral opis long Buka.

Provinsal Ritening Opisa, Jimmy Alwyin i tok em bai kisim Komisin tripela (3) wik bipo long kaun i pinis na ol i tokaut long wining kendidet.

Simon Soheke Asisten Provinsal Ritening Opisa i helpim long ranim dispela ileksen.

Wantok Niuspepa i no bin inap long kontektim Ilektoral Opis long Buka long taim bilong prin tasol i bilip wok bilong kaunim ol vot bai stat sampela taim long dispela wik.

Bihain long kaun na dikleresen, Ilektoral Komisin bai kisim ol rit i go bek long Gavman Haus, Konedobu long 19 Februeri.

Bogenvil sia i bin stap nating bihain long pastaim rijonal memba Joe Lera i risain long resis long sia bilong Atonomus Bogenvil Gavman Presiden namel long las yia.

Sikspela kendidet i resis long dispela sia. Dispela ol kendidet em Simon Dumarinu, Llane Munau, wanpela meri kendidet tasol, Peter Lemay Tsiamalili Jnr, Albert Punghau, pastaim memba bilong Bogenvil Haus ov Ripresentetiv, Peter Manuka na Ian Michael Mapya.

Mista Tsiamalili i tok sapos em i win, em bai givim kain sapot long Bogenvil gavman long ailan i kisim kain politikal gavman ol i laikim long en.

“Bikos long kain senis i wok long kamap, mi bilip em i taim yumi mas wok strong long kamapim kain gavman yumi laikim long em,” em i tok.

Mis Munau husat i wanpela jenelis (ripota) na muvi produsa i tok em i sanap long rait bilong ol meri na laik lukim ol meri na ol yangpela i gat gutpela sindaun.

Em i tok arere long em i kamapim ol wok long rijon, em bai wok strongim ol meri na ol yangpela.

Ilane i bung wantaim ol arapela lain manmeri na mekim ol muvi bilong ol hevi i pas long sut tok bilong soseri (sanguma), “sorcery accusation related violence” na narapela long Ambai na Aliko.

Em i hop olsem ol manmeri i gat gutpela tingting na makim meri long dispela taim.