DEPUTI Praim Minista na minista bilong Komes na Indastri Sam Basil i luksave long bikpela wok em i mas mekim long go pas long wok bisnis na helpim Praim Minista James Marape na gavman bilong em.

Long statim wok bilong em olsem minista Mista Basil i bung pinis wantaim ol ki ekseketiv na opisel long Dipatmen bilong Komes na Indastri, Invesmen Promosen Atoriti (IPA), Indastriel Divelopmen Koporesen na Nesenel Institut bilong Standet na Indastriel Teknoloji (NISIT) long Buang, Bulolo Distrik i no long taim i go pinis. Long dispela bung ol i toktok long ol nupela rot bilong go het wantaim wok bilong dispela sekta long 2021.

Mista Basil i lukluk long tripela bikpela tingting long dispela yia.

Namba wan em long mekim isi long ol foren invesmen long kam insait long PNG. Basil i tok dispela bai i bringim moa nupela mani long kantri.

Namba tu em long sapotim na mekim go bikpela ol bisnis we i stap long PNG long taim yet i kam na namba tri em long sapotim na groim ol bisnis bilong ol pipel bilong PNG stret.

Mista Basil i tok dispela ol tingting em i bikpela na i laik wok insait long wol bilong bisnis we i gat bikpela resis o kompetisen i stap.

Long mekim bisnis i kamap gut Mista Basil i laikim Dipatmen bilong Komes na Indastri i mas i gat gutpela straksa. Em i tok em bai i lukluk strong long mekim dipatmen i kamap Komes na Indastri Stetutori Atoriti.

Bihain long bung bilong ol long Buang, ol eksektiv na ol opisel i bin bung tu wantaim Lae Semba bilong Komes na raun lukluk long Malahang Indastriel Senta long Lae.

Mista Basil i bin go pas tu long seremoni bilong sainim Memorandum of Understanding (MoU) namel long PNG University of Technology na NISIT.