Long Mande 16 Novemba 2020, Nesenel Kot long Waigani i bin mekim disisen olsem graun posen namba 2156, 2157 na 2159 long Buswara em bilong Nambawan Supa.

Olgeta pipel husat i stap long dispela graun i mas lusim dispela hap long dispela taim nau inap Mas 16, 2021.

Kot i givim 120 de long ol pipel husat i stap long dispela hap i mas lusim dispela graun. Na long 16 de bilong Mas 2021 dispela graun mas stap klia long ol haus na manmeri.

Nesenel kot i givim strongpela tok tu long pablik olsem husat manmeri i laik baim graun ausait long siti i mas bihainim rot stret bilong baim graun. Na tu ol i mas askim Dipatmen bilong Graun long helpim ol.

Nambawan Supa i gat tingting long yusim dispela graun long mekim haus long sapotim bikpela populesen bilong Pot Mosbi na moa yet ol memba bilong en.

Las wik Nambawan Supa i bin putim aut wanpela toksave long ol arapela niuspepa soim ol graun mak bilong en.

UPNG Jenelis Sumatin Martina Takaneng