Ol Hawksbill trausel i wok long pinis nau bilong wanem ol i gat naispela sel we ol pipel i save yusim long mekim ol bilas bilong putim long bodi.

Gutpela stori i kamap long Nusa Resort long Nu Ailan provins olsem 89 Hawksbill bebi trausel i bon long Lisseneung ailan. Ol turis husat i stap long Nusa Resort na ol Lissenung Ailan Risot i bin gat gutpela sans long lukim ol 89 bebi trausel i bon.

Papa bilong dispela Risot na man husat I save lukautim envaironmen Diatmar Amon na meri bilong em Ange i mekim long laik na tingting bilong ol long lukautim husat i stap bilong ol dispela Hawksbill trausel bilong solwara long no ken pinis.

Diatmar na Ange i bin lusim ol dispela 89 bebi trausel go insait long solwara taim ol i bin strong long swim tasol nau long dispela taim ol i no save hamaspela i stap na hamaspela i dai pinis.

“Populesen bilong ol dispela Hawksbill trausel i wok long go daun na em bikpela samting olsem na ol i toksave long ol pipel husat go raun long hap i mas luksave na no ken bagarapim laip bilong ol trausel. Ol i mas lukautim Hawksbill trausel gut, “Ange i tok.

Tupela marit i save kisim kiau bilong dispela ol trausel long Raul Ailan we mama trausel i save putim kiau na karim i go bek long Lisseneung ailan na lukautim ol i go inap ol i kam out long sel bilong kiau bilong ol na go bek long solwara.

UPNG Jenelis Sumatin Martina Takaneng i raitim