WANPELA famili long Wes Kos Nu Ailan Provins i singaut nau long wanpela loging kampani long mekim kompensesen long indai bilong pikinini man bilong ol.

Peter Trolomo wanpela papa long ples Komolobuo i singaut long Basoma Holdings Ltd peim olgeta kos bilong haus krai bilong pikinini man bilong ol, Desmond Laut.

Ol stetmen bilong ol witnes i soim pikinini man bilong Mista Trolomo i bin dai long Trinde 16 Desemba taim tupela polisman i bin pulim em aut long wanpela PMV kar i karim ol meri i go long maket na kisim em i go long kem bilong em.

Long dispela kem ol i bin paitim yangpela Desmond nogut tru na bihain wanpela i sutim em long gan taim Desmond i laik ranawe.

Wanpela pas bilong Mista Trolomo i soim olsem tupela polis man i bin wok olsem sekyuriti bilong Basoma Holdings Ltd taim dispela birua i kamap.

Ol famili bilong Desmond i ripotim dispela hevi long ol polis long Konos pinis. Na tu ol i bin holim wanpela bung wantaim menesa bilong Viva Success na bilong Basoma Holdings wantaim polis long Kavieng Polis Stesin long stretim dispela hevi.

Bodi bilong yangpela Desmond i stap nau long Kavieng Haus Sik. Desmond i gat 22 krismas taim em i dai.

Wantok Niuspepa i no bin inap long kisim tok long wanem as tru na ol polis i holimpasim Desmond.