WANPELA bikpela intanesenel kampani bilong kopi long Goroka, Isten Hailans i givim sapot long spot long Bihute Haus Kalabus.

Dispela long lukim ol kalabus lain i gat ol bal na spot ikwuipmen long taim bilong pilai.

Monpi Kopi Ekspot kampani i bin kamap wantaim helpim we i kam long fom bilong ol bal bilong pilaim ol spot olsem ragbi lig, tats futi, basketbol na volibol.

Mausman bilong Monpi kopi kampani Stella Willie husat i bin i go pas long kamapim samting bilong dispela ol spoting ikwipmen i tok, kampani bilong em i kamapim pinis patnasip wantaim CIS long Bihute we em i givim ol kopi sidling (pikinini bilong ol kopi) long kamapim neseri insait yet long banis bilong kalabus.

“Na long strongim dispela patnasip, mipela i kamap wantaim dispela sapot bilong givim ol spoting ikwipmen, long wanem, mipela i luksave olsem, i gat nid bilong dispela ol kalabus lain. Olsem na mipela i provaidim dispela ol nid we bai i ken helpim ol long taim ol i stap insait long banis”, Willie i tok.

Sape Metta i raitim