Ol 16 Koreksenel Sevis Opisa na wanpela meri long Non-Gavman ogenaisesen i greduet long las wik Fraide na kisim setifiket bihain long tupela wik trening bilong ol trena.

Ol CS opisa long arapela hap long kantri i kam long Bomana Koreksenel Institut long kisim dispela trening. Ol i kisim trening na skul bilong Prison Indastri Bisnis Menesmen kos.

Dispela i kamap aninit long Prison Indastri Program bilong CS. Dairekta bilong Prison Indastri Suprintenden Jericho  Chara i tok bikpela tingting bilong dispela trening em long trenim ol opisa bilong CS husat i save i go pas long ol projek insait long wan wan Koreksenel Institut long kantri. Bai ol i ken kisim save long lukautim bisnis.

Ol dispela opisa i nau kisim setifiket long i go na trenim ol kalabus manmeri long lukautim bisnis taim ol i lusim kalabus na i go stap long komyuniti.

“Wantaim dispela trening, mipela i laik lukluk long ol opisa o ol wokmanmeri, ol kalabus manmeri na ol manmeri long komyuniti. Ol opisa husat i kisim trening pinis bai go na trenim ol tu long kamapim ol liklik bisnis na lukautim,” Suprintenden Jericho Chara i tok.

Em i tok aninit long Prison Indastri i gat ol projek na ol program na dispela trening bai helpim ol opisa na ol kalabus long lukautim ol projek bilong prison indastri. Bikpela tingting bilong ol program insait long prison indastri em long sapotim na helpim gut ol kalabus manmeri long i go stap gut long komyuniti.

Trena bilong ol long dispela tupela wik em Dairekta bilong Bisnis Edvaisari na Kepesiti Bilding long Small na Medium Enterprises Corporation, Peter D. Piawu. Em i tok amamas long ol na i strongim ol long i go na kamapim senis long wanem hap ol i stap long en.

Rebecca Negere i raitim