MINISTA bilong Edukesen, Jimmy Uguro i salensim ol papamama na ol lain husat i gat pikinini
i stap long elementeri i go sekenderi skul long redim 37 pesen skul fi mani-mak aninit long
nupela gavman tuisen fi sabsidi program.

Minista Uguro i givim eksampel o piksa olsem sapos wanpela skul i sasim K200 skul fi em bai
lukim olsem papamama i mas baim K74 na Gavman bai baim K126 aninit long dispela nupela
sabsidi program long dispela yia.
Minista Uguro i tokaut olsem Dipatmen ov Edukesen long kantri i nidim K216 milien long
helpim program bilong tuisen fi sabsidi long dispela yia.
Em i tok Praim Minista Marape i bin toksave long em wantaim Edukesen Seketeri, Dokta Uke
Kombra olsem Treseri Dipatmen bai painim mani long sapotim dispela program long dispela yia.
Em i askim tu wan wan ol Open na Provinsal Memba long helpim long baim skul bilong ol
sumatin.
Uguro i tok ol provins olsem Is Sepik, Morobe, Is Nu Briten, Nu Ailan, Milen Be na Enga i
sainim pinis agrimen wantaim gavman long bai baim skul fi bilong ol sumatin bilong ol.
Tasol em i tok ol papamama i mas redim ol yet wantaim mani tu long helpim ol pikinini long go
long skul.

James G. Kila i raitim