WANPELA stadi we i bin kamap i no long taim i go pinis long Bulolo Distrik long Morobe
Provins, i soim olsem ol manmeri na pikinini husat i gat disabiliti i kisim bikpela taim tru.

Ripot i tokaut olsem ol i no gat ol samting we ol i bai nidim long helpim ol long stap gut
olsem wilsia na ol samting bilong helpim ol long harim na lukluk. Na tu planti bilong ol i
nogat wok.
Wokpainimaut i soim olsem 859 manmeri na pikinini long Bulolo Distrik i gat disabiliti. Long
dispela namba, 161 i stap long praimeri skul, 33 i stap long sekenderi skul na 6-pela i stap
long teseri institusen.
Morobe Famili na Seksual Vailens Eksen Komiti (FSVAC) Seketeriet Kodineta, Thelma
Hungito, husat i helpim long karimaut dispela stadi i tok, ol i luksave olsem planti salens ol
pipel i stap wantaim disabiliti i save bungim em insait long ol rurel eria.
“Ol infomesen i soim olsem ol i no save kisim ol besik sevis. Na ol i save kisim taim long pasin
bilong wansait na ol pipia toktok, na poveti o hangre, na tu ol i no inap long kisim besik sevis
bilong helt na edukesen,” Ms Hungito i tok.
Em i tok, “Ol pipel wantaim disabiliti we i gat problem long tingting na sanap stret husat i
stap long ples i save lukluk tasol long ol famili bilong ol long sapotim ol, na sampela taim ol i
save kolim ol yusles.”
Hungito i tok wanpela bikpela tingting i olsem, ol manmeri na pikinini wantaim disabiliti stap
longwe long ol taun o eben eria long Morobe Provins i no wok long kisim ol spesel edukesen
sevis bilong ol disabel.
Mak bilong ol nid bilong ol manmeri na pikinini wantaim disabiliti we dispela stadi i
painimaut i ken kamap olsem evidens long helpim ol gavman na ol arapela ogenaisesen long
sapotim ol sevis bilong ol disabel long Bulolo. Na tu i ken helpim ol long mekim awenes na
kamapim bikpela fesiliti long luksave long ol dispela kain nid.
“Ol pipel i mas save olsem ol manmeri na pikinini wantaim disabliti em ol wankain olsem ol
nomol manmeri na pikinini i stap long komyuniti na ol i gat wankain rait olsem yumi,”
Hungito i tok.
Dispela stadi i kamap long bihainim singaut bilong Gavman aninit long Nesenel Polisi bilong
Disabiliti 2015-2025. Dispela polisi i singaut long kamapim eksen long strongim ol manmeri
na pikinini wantaim spesel nid long kisim wankain rait olsem ol nomol manmeri na pikinini
na kamapim sans bilong ol long wok na amamas wantaim ol arapela.