WANPELA yangpela edvoket bilong “mekim Madang kamap nupela gen’, Kurere Stanis Matanzana i tok
em i laik lukim hevi bilong ol pipel bilong Manam i mas kamap praioriti bilong Madang gavman na
nesenel gavman.

Matanzana i tok em i moa long 16 yia nau na I no gat gutpela toktok long hau gavman bai I helpim ol
Manam.
Tasol em i gat bilip long nupela eksetiv komiti bilong Manam Restoresen Atoriti. Em i bin bung wantaim
ol komiti memba na em i amamas i gat senis long dispela atoriti.
Em i tok longpela taim gavman na ol atoriti i lus tingting long ol pipel bilong Manam.
“Mi mekim liklik kontribusen, em ol wara tenk mi na ol wanskul i bringim long ol tripela kem long
Potzdam, Asuramba na Mangem, Kurere i tok.
“Dispela helpim em i no inap tasol insait long dispela liklik wok mi laik putim long tebol wari bilong ol
pipel bilong Manam.
“Mi lukim ol wara ol i save yusim na mi sori na kros tu wantaim. Ol wara i no seif tru long ol pipel long
yusim. Ol i save kisim na boilim na bihain yusim.
“Ol pipel i no gat fridom long mekim gaden na kirapim bisnis long wanem ol i sindaun long graun bilong
ol arapela lain. Planti bilong ol i go bek long ples pinis,” Kurere i tok.
Kurere i mekim dispela wok bilong helpim ol yangpela long tingim wanem samting i bin kamap na olsem
wanem ol i kam sindaun olsem long bikples long Bogia. Dispela yangpela man i bin gat 7-pela krismas
taim maunten i paia long Manam na ol pipel i mas lusim ailan. Nau 16 krismas bihain no gat gutpela tok
tok i kamap yet long stretim sindaun bilong ol.

Rosa Koian i raitim