PRAIM Minista James Marape na Bogenvil Presiden Ishmael Toroama long Mande i sainim
wanpela pepa long strongim ol toktok bilong Bogenvil Pis Agrimen.

Dispela agrimen i bihainim tok i stap long Seksen 342 (1) bilong Mama Lo bilong Papua
Niugini na Klos 311 (b) bilong Bogenvil Pis Agrimen olsem Gavman bilong Papua Niugini
na Atonomus Bogenvil Gavman (ABG) i mas kamapim ol kain bung.
Agrimen i askim tupela gavman long holim ol join “consultation” bung long toktok long
risalt bilong Bogenvil Referendum we i bin kamap long las yia.
Ol bai makim wanpela Modereta long go pas long dispela ol toktok.
Inap long 97.7 pesen Bogenvil manmeri husat i vot long referendum i vot long kisim
Independens.
Marape na Toroama i tok insait long dispela ol “consulation” bung ol bai tokok long bihain
taim politikal laip bilong ailan.
Ol bai mas kamap wantaim kain rot we ol bai yusim long mekim ol rekomendesen i go long
Nesenel Palamen long mekim disisen.
I bin gat tupela bikpela askim em ol pipel bilong Bogenvil i bin kisim bipo long ol i holim
referendim, em long kisim moa atonomus edministretiv pawa o kisim independens.
Long dispela 97.7 pesen manmmeri husat i bin inap long vot i vot long kisim independens.
Tasol Praim Minista James Marape long stat bilong 2020 i tok em i laik Papua Niugini i mas
stap wanpela kantri na wanpela pipel.
Em i tok em i no gutpela wan wan hap bilong kantri i mas bruk.
Moa yet, wok we i mas kamap bihainim kamap bilong referendum i “non-binding.”
Dispela i min gavman i no mas bihainim tingting bilong ol manmeri long wanem samting ol i
tok long em.
Dispela disisen i stap long nesenel palamen, moa yet, long han bilong praim minista sapos em
i mas bihainim askim bilong ol manmeri.
Dispela em bikos i no gat wanpela hap bilong Mama Lo (Konstitusen) we i tok ol manmeri i
ken vot long wanem tingting ol i gat long stap bilong ol, sapos ol i mas bruk lusim Papua
Niugini o nogat.
Aninit long Oganik Lo long Bogenvil Pis Bilding, Seksen 54, long tok bilong Pis (Peace)
Bilding Agrimen i gat tripela hap, we Gavman bilong Papua Niugini na Atonomus Bogenvil
Gavman (ABG) i sainim 19 yia (2001) i go pinis long ol toktok bilong Gud Gavanens,
Wepon (Weapon) Disposal na Referendum.
Olgeta dispela tripela wok i kamap pinis.
Bihainim dispela ol wok, wanpela hap bilong agrimen i tok gavman i mas tokaut long disisen
bilong em long autkam bilong referendum bipo long 2025.