OL pipel bilong Bogenvil bai vot long rijonal sia long neks wik. PNG Ilekoral Komisina, Simon Sinai i tok wok bilong kempen klostu i pinis na Komisin bai
holim wanpela-de vot long neks wik Trinde, 20 Jenueri.

Bihain long dispela kaunim i stat inap kainim i pinis na Komisin i tokaut long wina.
Komisin bai kisim ol rit i go bek long Gavman Haus long 19 Februeri.
Inap long 6-pela kendidet i nominet long resis long dispela sia.
Namel long ol em wanpela meri.
Dispela meri em Ilane Munau, wanpela jenelis (ripota) na muvi produsa.
Munau i tok em i laik sanap long rait bilong ol meri na lukim ol meri na ol yangpela i gat
gutpela sindaun.
Em i bilip em inap long senisim tingting bilong manmeri long votim em.
Em i bin mekim dispela tok long taim em i bin nominet long resis long Desemba las yia.
Ilane i bung wantaim ol arapela lain manmeri na mekim ol muvi bilong ol hevi i pas long sut
tok bilong soseri (sanguma), “sorcery related violence” na narapela long Ambai na Aliko.
Em i hop olsem ol manmeri bai gat gutpela tingting na makim meri long dispela taim.
Bogenvil sia i stap nating bihain long pastaim rijonal memba Joe Lera i lusim sia long resis
long sia bilong Atonomus Bogenvil Gavman Presiden long las yia.
Inap long 200,000 manmeri bai vot long dispela ileksen we bai gat 410 poling tim bai stap:
120 long Saut Bogenvil, Not Bogenvil (172) na Sentral (118).
Praimeri kaunt bai kamap long ol komyuniti asembli na ol elimenesen kaunt bai kamap long
rijonal ilektorel opis long Buka.