PAPUA Niugini i bin stap isi long las wik Fraide taim gavman i holim lotu na planim bodi
bilong Sir Mekere Morauta long Pot Mosbi.

Sioni Kami Memorial Yunaitet Sios i pulap, rot long sios i go long Palamen i pulap na hap
bilong planim bodi bilong Sir Mekere klostu long Palamen Haus i pulap long ol manmeri.
Ol lida na manmeri wantaim i sanap, tromoi han na krai long ol hap we bodi bilong Sir
Mekere i go long em.
Mosbi siti yet i stap isi, no gat manmeri i go kam, no gat kar i ran long rot long ol hap nating.
Ol manmeri husat i stap long ol arapela hap bilong kantri i harim long redio na lukim long
televisen i wari na krai i wari na krai tu.
Dispela em kain rispek ol manmeri long PNG i gat long Sir Mekere na i givim luksave long
man husat i bin sanap long pait egensim pasin korapsen na kamapim ol lo bilong gutpela
bilong ol pipel.
Gutpela pren, “brata” na yunivesiti wanskul bilong em, Sir Rabbie Namaliu, Charles Lepani
na meri husat i wok long opis bilong Sir Mekere Morauta longpela taim, Ledi Winfred Kamit
i tokaut long laipstori bilong Sir Mekere.
Praim Minista James Marape i makim kantri na givim tok sori long Sir Mekere na famili
bilong em, na Oposisen lida, Belden Namah i tokaut long Sir Mekere i rol model bilong em.
Ol aunty bilong Sir Mekere i mekim Toaripi (Galp) pasin kastom long krai long bodi bilong
em na wanpela lida long Toaripi pipel i makim ol manmeri bilong em na givim bodi i go long
gavman na kantri long planim bodi long Independens Hill, klostu long Palamen Haus.
Sir Mekere i dai tasol ol manmeri bai tingim em long ol gutpela wok na lo em i kamapim na
pasin em i bihainim.
Gutbai Sir Mekere.