MADANG Nesenel Kot long dispela wik Mande i bin sindaun na harim stori bilong ol lida long
hevi bilong Madang taun rot.

Kot i bin askim ol stekholda olsem Madang Provinsal Gavman na edministresen wantaim
Madang Open Memba Bryan Kramer na Gavana Peter Yama long redim gut ol stetmen bilong ol
bipo long ol i kamap long kot.
Moa long en tu Kot i tokim dispela lain long tokaut stret wanem as tru Madang taun rot i bagarap
wantaim planti baret longpela taim stret.
Dispela Kot em pastaim Nesenel Kot Jas, Jastis David Cannings i bin bringim aninit long humen
rait na sapos dispela bagarap i kamap long rot i givim hevi long raits bilong ol pipel.
Kot bai i lukluk i go insait sapos wok bilong Besik Rait aninit long Seksen 57, Sabseksen 3 i no
orait aninit long Mama Lo o Konstitusen bilong PNG.
Ol lain husat i bin kamap long Kot em Madang Gavana, Peter Yama, Memba bilong Madang
(MP) na Jastis Minista, Bryan Kramer na 13 arapela lain husat i stap olsem stekholda long
Madang taun.
Nesenel Kot i harim na i givim oda olsem ol dispela lain i mas redim ol yet gut pastaim long
Janueri 18, 2021 long givim stetmen o stori bilong ol.
Ol i mas tokaut stret long Kot olsem husat tru em wok bilong en long stretim rot o wok
meintenens long Madang taun rot.
Namba wan harim bilong olgeta ol stori ol dispela lain bai givim em bai kamap long Janueri 25
na ol lain husat i gat bel hevi na i no amamas long Madang taun rot kondisen bai kamap long
givim ol stori bilong ol long hevi ol i bungim taim Madang taun rot i bagarap.
Ol bai givim ol testimoni bilong ol na tu Kot bai mekim ol askim.
Moa long dispela, Kot bai glasim ol toktok na bel hevi long ol rot i bagarap i kamap we ol pipel i
no amamas long en.
Jastis Cannings i givim oda tu olsem namba tu harim bilong Kot bai kamap long Janueri 26 em
long Tunde na dispela bai taim bilong harim ol sabmisen o bekim long wanem samting i mas
kamap.

James G. Kila i raitim