LENONA bilong posen 49 long Kavieng Ples Balus i bin mekim wanpela bel isi protes long
Kavieng Ples Balus

las wik long kisim tingting bilong memba bilong Kavieng na Nesenel
Tresera Ian Ling Stuckey husat i bin laik kalap long balus long Kavieng long dispela moning.
Tasol ol i bin lusim na i go i kam bihain long ol poto bilong ol i mekim protes i go long olgeta
hap long sosel midia.
Taim Minista Stuckey i kamap long ples balus, ol i askim em long kompensesen we ol i no bin
kisim taim gavman i apgredim Kavieng ples balus na mekim i go bikpela. Tasol ol lenona i
tok, “Em i tok, mi no gat taim long yupela. Yupela i go stretim wantaim National Airport
Cooperation (NAC) na Provinsal Gavman.”
Dispela bel krai bilong ol lenona i kamap bihain long ol i kisim wanpela K3milien sekmani
long 15 Julai, 2020 long taim ol i bin brukim graun long kamapim Kavieng Intanesenel Ples
Balus. Dispela sekmani i bin bauns bek o benk i bin tok nogat long dispela sek. Dispela
sekmani i bin senis i go kamap K1milien na dispela tu benk i tok nogat.
Dispela toktok i go kamap long iau bilong Nu Ailan Gavana Sir Julius Chan. Tasol Sir Chan i no
bin kirap nogut long harim olsem ol lenona i mekim kain pasin bikos em tu i bin askim
Nesenel Gavman long baim gut ol pipel bilong en.
“Mi no bin wanbel long ol i brukim graun bilong apgredim Kavieng Intanesenel Ples Balus
inap ol i baim K10 milien o moa long 15 Julai, 2020. Mi bin raitim pas i go long Minista Bilong
Eviesen na Praim Minista long ol i mas baim K15 milien long ol lenona. Dispela em i diman
bilong mi bikos ol lenona inap long kisim moa mani long Nesenel Gavman bihain long ol i
wet 10-pela krismas na i no kisim wanpela mani long graun bilong ol.
“Tasol sampela ol lenona namel long ol i bin sakim tok na wanbel wantaim memba bilong
Kavieng na Praim Minista long kisim K3milien. Mi no bin kisim wanpela toksave long dispela
plen bilong ol olsem na mi stap arere na lukluk tasol na nau mi bilip olsem ol i ken lukim
olsem mi bin pait strong long mani bilong ol bipo yet,” Sir Julius i tok.
Ol i bin yusim 1.4 kilomita graun long mekim epot i go bikpela. Ol lenona i bin askim long
K10 milien long dispela graun tasol nau 10-pela krismas i kam i go nau na ol i no kisim
wanpela samting.
Sir Julius i tok ol pipel i bin daunim bel bilong ol na stap isi long 10-pela krismas.
“Hamas moa bel isi bai ol pipel i gat? Olsem wanem na Nu Ailan i stap insait long kain hevi
longpela taim tru?”