KOMISINA bilong Polis David Manning i mekimsave long wanpela polisman husat i bin spak
na draivim wanpela ten sita

Toyota lenkrusa long las wik Fraide na bamim wanpela 25 sita
PMV bas long nupela rot stap klostu long Palamen Haus, Waigani long Pot Mosbi.
Dispela Toyota lenkrusa i stap aninit long lukaut bilong Gordon Polis Pablik Sefti Yunit long
Gordon Polis Stesin. Wanpela yangpela meri i stap insait long PMV i bin lusim laip bilong em
long dispela taim na faivpela i kisim bikpela bagarap.
Komisina Manning i saspendim tu Komanda bilong Gordon Polis Stesin, namba tu bilong
Komanda na supavaisa bilong sift long dispela taim.
“Komanda bilong Gordon Polis Stesin bai tokaut bilong wanem na bai mipela i no ken givim
sas long en long em i asua bilong en long i no kontrolim ol polisman i stap aninit long lukaut
bilong en. Wankain tu long namba tu bilong en na supavaisa bilong sift tu.
“Gutpela koman na kontrol na strongpela lukaut i mas kamap long olgeta mak o level bilong
koman straksa bilong Konstabulari long helpim ol polismanmeri stap gut na mekim wok stret
na i no ken wansait o pret. Mipela i mas rispektim ol lain antap long mipela na tu kisim
rispekt long ol lain i stap aninit long mipela. Sapos i nogat ol dispela gutpela pasin i stap bai
ol polismanmeri bikhet planti na bagarapim ol sitisen,”Komisina Manning i tok.
Komisina Manning i gat sampela tingting long kamapim wanpela rot we ol entaitelmen o
sevings bilong ol polismanmeri husat i bikhet bai i go long stretim ol propeti bilong stet o
gavman.
“Longpela taim tru ol polismanmeri i wok long ranawe isi tasol long asua bilong ol. Mi laik
mekimsave gut long ol polismanmeri husat i kamapim ol kriminol pasin bai ol arapela
polismanmeri i lukim na lainim,” Komisina Manning i tok.
Em pinis
Kepsen: Bosman bilong 4 Mail Trafik ,Sinia Inspekta Joseph Salle, husat i bin i go i stap long
dispela hap hevi i kamap long kisim gut ol infomesen i tok wokpainimaut i tokaut olsem,
polisman i bin spak olsem na em i spid i kam na bamim 25 sita bas we i lusim pinis ples
bilong bung o intasep. Em i tokaut tu olsem planti birua i save kamap long dispela hap rot
bikos ol trafik lait i no save wok. Olsem na em i tok ol draiva i mas isi taim ol i kam long
dispela hap.
Baksait long Inspekta Salle em Tou Trak bilong ol polis i apim dispela 10 sita Toyota lenkrusa
i go.