TUMORA Fraide 8 Janueri em i pablik holide.

Dispela long tingim dai bilong Sir Mekere Morauta, Memba bilong Mosbi Not-Wes na husat pastaim i praim minista bilong kantri.

Tumora tu ol bai holim lotu bilong em long Sioni Kami Memorial Yunaitet Sios haus lotu na givim las rispek bilong ol.

Gren Sif Sir Michael Somare bai makim kantri na givim toktok I go long Sir Mekere na Sir Rabbie Namaliu bai tokaut long laip stori bilong em.

Bihain long dispela ol bai kisim bodi bilong em na planim long Independens Hill, klostu long Palamen Haus em ples we ol I makim long planim ol Memba bilong Palamen husat I bin kamap praim minista.

Ol i planim pinis bodi bilong Sir Bill (William) Skate long dispela hap.

Long Mande dispela wik i kam inap long tude, gavman i givim taim tu long ol Memba bilong Palamen na pablik long go lukim bodi bilong Sir Mekere Morauta long Gren Hall long Palamen haus na soim rispek bilong ol.

Long Mande namba wan de taim Nesenel Kapital Distrik Komisin oganaising komiti i kisim bodi i go long palamen, sampela Memba bilong Palamen i bin go lukim bodi bilong Sir Mekere. Namel long ol em Praim Minista James Marape na ol pastaim praim minista olsem Gren Sif Sir Michael Somare, Sir Julius Chan na Peter O’Neill. Sir Rabbie Namaliu i bin lukim bodi bilong Sir Mekere na soim rispek bilong em long Brisben, Australia long 23 Desemba, 2020 taim ol i holim namba wan lotu long dai bilong em.

Poto: Kingsley Kingsley Tabing ... lukim moa stori pes 2, 3 na 17.