MEKERE Morauta i namba wan man long greduet na kisim Ikonomik Digri long Yunivesiti bilong Papua Niugini.

Em i kamap Memba bilong Palamen long 1997 Jeneral Ileksen na i kamap Praim Minista long 1999 i go inap long 2002.

Long 1997 i go long 2012 na bihain long 2017 i kam long 2020 em i stap Memba bilong Mosbi Not-Wes long nesenel Palamen.

Pastaim long em i go insait long wok politik, Morauta i bin stap Seketeri bilong Fainens (1972-1982), stap Menesing Dairekta bilong Papua Niugini Benking Kopresen (1983-1982), Gavana bilong Benk bilong Papua Niugini (1993-1994) na bihain long dispela i stap dairekta bilong bisnis bilong em.

Taim em i stap Praim Minista, Mekere Morauta i kamapim ol bikpela senis long wok bilong lo na ikonomi.

Long 1999 ikonomi bilong kantri i go bagarap, strong bilong Kina (currency) tu i pundaun i go daunbilo tru na kantri i stap long mak bilong bruk.

Sindaun i no gutpela na planti manmeri wantaim ol bisnis long ol arapela kantri i pret na i ranawe i go bek long kantri bilong ol.

Dispela i lukim sampela Memba bilong Palamen i bel hevi tru na laik senisim gavman long Vot I Nogat Bilip (VONC).

Morauta i kamap Praim Minista we em i bihainim Strakserel Edjasmen Program (SAP) bilong Intenesenel Moniteri Fan (IMF) na strongim kantri gen.

Dispela ol senis i kamap long wok bilong fainens sekta long benking na supanuesen, pablik sekta na rivium konstitiusen, moa long sait bilong politik na kamapim Opis bilong Ogenik Lo long Integriti bilong Politikal Pati na Kendidet (OLIPAC).

Olsem Minista bilong Pablik Entaprais long 2011 i go long 2012, Morauta i kamapim Independen Pablik Bisnis Kopresen, moa long strongim ol bisnis han bilong gavman.

Bihain long em i ritaia long politiks long Ogas, 2012, ol i makim Mekere olsem lida bilong Pasifik Ailan Forum olsem “Eminent Person” long rivium Pasifik Plen. Dispela ripot em ol i pablisim long 2013.

Long 2012 yet, gavman i makim em olsem Siaman bilong Papua Niugini Sastenabel Divelopmen Program (PNG SDP) kampani.

Long 2017 em i resis long Jenerel Ileksen na winim sia bilong Mosbi Not-Wes.

Mama i karim Mekere long 1946 long Kukipi viles, Malalaua Distrik, Is Galp.

Morauta Hasu i papa bilong em na Morikoai Elavo i mama. Papa Morauta i wanpela lida long Toaripi pipel long Is Galp na i wanpela lokal gavman kaunsila na i diakon bilong London Misineri Sosaiti (Yunaitet Sios). Morauta i helpim long kamapim tu Kopretiv Movmen long Toaripi Asosiesen.

Kualifikesen

• 1970 kisim Betsela bilong Ikonomik long Yunivesiti bilong Papua Niugini;

Awot

• 1987 Doktret bilong Teknoloji (Honori) long Yunivesiti bilong Teknoloji long Lae;
• 1990 Knight Betsela;
• 2001 Memba bilong “Privy Councillor”,
• 2001 Doktret long Ikonomiks (Honeri) long Yunivesiti bilong Papua Niugini;
• 2009 “Knight” Komanda long Oda bilong St Michael na St George;

Ol arapela wok (Emploimen)

• 2007- 2011 Lida bilong Oposisen long Nesenel Palamen;
• 2004-2006 Siaman, Nesenel Kapital Distrik Komisin;
• 2002-2004 Lida bilong Oposisen long Nesenel Palamen;
• 1998-1998 Minista bilong Fiseris;
• 1997 – 1998 Minista bilong Nesenel Plening na Implementesen;
• 1994-1997 Ekseketiv Siaman, Morauta Invesmen Pty Ltd;
• 1983 Ekseketiv Siaman, Burns Philps (PNG) Limited;
• 1973-1982 Seketeri, Dipatmen ov Fainens;
• 1972 Ikonomis, Opis bilong Ekonomik Edvaisa;
• 1971 Risets Opisa (Manpower Planing), Dipatmen ov Leba

Bod Memba bilong ol ogenaisesen

• Siaman Benk ov Papua Niugini (1973-1982, 1993-1994);
• Siaman, Nesenel Airline Komisin (1992-1994);
• Komisina, Nesenel Airline Komisin (1973-1992);
• Siaman, Nambawan Fainens Limited (1983-1992);
• Dairekta bilong ol kampani olsem Highlands Gold Limited (1989-1993); Mount Isa Mines PNG (1989-1993); Barracuda Pty Limited) 1989-1993); Angco Limited (1983-1993; 1994-1998); James Barnes PNG Pty Ltd (1984-1993); PNG Associated Industries Ltd (1983-1993); Member of Advisory Board for South Pacific Project Facility, International Finance Corporation (1992-1995); na
• Taim i stap Seketeri bilong Fainens em i bin stap bod Memba bilong ol ogenaisesen olsem Benk ov Papua Niugini; Papua Niugini Divelopmen Benk; Invesmen Kopresen bilong PNG: Ilektrisiti Komisien; Pos na Telikomyunikesen Kopresen; Bogenvil Kopa; Ok Tedi Maining Ltd; Nesenel Providen Fan; na Pablik Supanuesen Fan; i makim nesenel gavman na i stap Alernative Gavana long ol intenenesel benk olsem Wol Benk, Asian Divelopmen Benk na IMF.

Nem long gavman haus

• Gavman i bihainim nem na givim nem Morauta Haus long wanpela bikpela haus o Opis bilong em long Waigani.

Em i bin stap komiti memba bilong ol sios ogenaisesen olsem Salvesen Armi, Red Cross (PNG) Fan Resing Komiti;  PNG Fishing Indastri Asosiesen na Half-Way Haus, Morata.

Em i bin dai long 19 Desemba, 2020 long wanpela haus sik long Brisben, Australia.