PAPUA Niugini i bin lusim wanpela strongpela na bikpela man bilong kantri. Leit Sir Mekere Morauta em i wanpela Praim Minista bipo na memba bilong Mosbi Not Wes long taim em i dai.

Siaman bilong Australia Konsuma na Kompetisen Komisen Rod Sims i tok, “Taim PNG i kisim independens, ol yangpela  wokman bilong dispela taim  bai i gat hevi tasol mipela i bin gat Sir Mekere Morauta.

“Sir Mekere em i wanplea man husat i bin senisim planti samting long kantri PNG taim em i bin stap Praim Minista long 1999 inap 2002,” Rod Sims i tok.

Rod Simon i tok Leit Sir Mekere i bin wok tu long heplim PNG long kisim helpim long narapela kantri bihain long independens. Em tu i  wokim ol samting bilong helpim ikonomi bilong kantri long mekim ol wok olsem ol bikpela kantri i save mekim.

Long taim bilong kisim independens Leit Sir Mekere  em i wanpela bilong ol man husat i bin stap na helpim long givim tingting long man i go pas, Rod Sims i tok.

Em i wanpela bilong ol man husat i bin stap long senisim nem bilong mani bilong PNG long sens na dola i go long kina na toea. Leit Sir Mekere  tu i  bin kisim ol bikpela wok posisen taim em i yangpela man yet.

Planti samting long wok wantaim mani i bin kamap gutpela taim Mekere i bin stap Praim Minista. Ikonomi bilong kantri i bin ran gut tru.

Wanpela bipo memba bilong palamen  Leit Sir Anthony Siaguru bin kolim Sir Mekere olsem wanpela refomis man bilong mekim senis bilong PNG.

Leit Anthonya Siaguru i bin tok,  Sir Mekere i bin stretim ikonomi bilong kantri taim em i bin bagarap na i stap na tu em i mekim Papua Niugini Benking Koporesen i kamap wanpela praivet koporesen.

 “Em i bin mekim ol independen institusen long lukautim Ok Tedi Maining.”

 Richard Kuna husat i bin wok wantaim Leit Sir Mekere i tok, “Em i bin heplim ol lain long National Provident Fund (NPF) taim 50 pesen mani bilong ol lain i no bin stap moa long akaun.  

“Dispela i bin helpim long rausim ol bikpela man husat i stap insait long NPF na  putim ol nupela wok man i go insait. Em i bin helpim tru dispela kampani nau ol i kolim NASFUND,” Richard i tok.

UPNG Jenelis Sumatin Samantha Solomon i raitim