OL Polis long Sentral Provins i mekim wokpainimaut long dai bilong wanpela man na wanpela meri long taim bilong Krismas.

Wanpela dai i kamap long Brown River klostu long Hiritano Haiwe na narapela i kamap long Kemabolo long Rigo klostu long Magi Haiwe.

Ol polis i tok dispela tupela dai i kamap bikos long domestik vailens o pait insait long haus na famili.

Provinsal Polis Komanda (PPC) bilong Sentral Provins, Inspekta Tapp Opai i tok ol i arestim na holim pinis man long Sentral Provins husat i bin sutim meri bilong en long naip meri i dai.  

PPC Inspekta Opai i tok dispela hevi i kamap bihain long krospait namel long dispela tupela marit long Brown River long Krismas de. Dispela meri em bilong Is Nu Briten Provins na bodi bilong en i stap nau long Pot Mosbi Jeneral Haus Sik.

PPC Opai i tok yangpela man husat i bin lusim laip long dispela taim tu i tok ol i bilip olsem ol sampela lain i paitim em long het bilong en long botol. PPC i tok ol i bai arestim saspek long dispela wik.

PPC Opai i tok ol polis long Sentral provins i arestim na holim 29 saspek na sasim ol long dring spak na mekim ol bikhet pasin insait long krismas taim.

Mista Opai i tok maski tupela dai i kamap, ol polis long Sentral Provins i mekim gutpela wok long strongim pasin bel isi na gutpela pasin long planti hap bilong provins.

Em i tok tenkyu long ol memba bilong en long gutpela wok ol i mekim. Em i surukim tok tenkyu i go tu long ol pipel long Sentral long strongim bel isi na gutpela pasin long ol ples na komyuniti ol i stap long en.