KTING Polis Komisina Donald Yamasombi i tok polis bai arestim ol lain husat i kamapim giaman nius long sosel midia olsem Polis Komisina David Manning bai stap aninit long arest taim em i kam bek gen long wok.

“Dispela em i no namba wan taim ol kain giaman nius i bin i go aut long pablik. Mi no inap long larim kain ol pasin i go het, ba mi sekim na kisim ansa pastem. Mi kamapim pinis wanpela tas fos long mekim wokpainimaut long dispela na arestim ol lain husat i kamapim na karim aut dispela giaman nius. Bai ol i yusim ol save man bilong IT na ol raitpela teknoloji na risos insait long tripela mun long painim aut ol dispela bikhet lain, putim ol kam ples klia na mekimsave long ol. Ol eksen bilong ol i nogut na i olsem kriminol olsem na bai ol i kisim sas aninit long ol lo i stap pinis.

“Mi tok nogat long dispela giaman nius i raun long sosel midia. Dispela pipia nius bai  bagarapim polis fos na tu i ken kamapim hevi long nesenel sekyuriti,” Mista Yamasombi i tok.

Mista Yamasombi i singaut long ol bodi bilong gavman olsem NICTA, na PNG Sensosip Bod long toktok planti long ol bikhet pasin we i save kamap long sosel midia na kamapim pret, tingting planti na bagarap.

Em i tok, ol polis na ol sitisen i wok long kisim planti tingting taim ol lain i bagarapim ol narapela na mekim planti giaman toktok long sosel midia.

Mista Yamasombi i tok em i pas wantaim Polis Komisina Manning na i save toktok wantaim em olgeta de long ol wok insait long operesen na edministresen bilong polis fos.

“Mipela i gat gutpela wok rilesensip na kain ol giaman toktok bai no inap bagarapim ol wok mipela i laik kamapim insait long polis na long kantri tu,” Mista Yamasombi i tok.

Ekting Polis Komisina Donald Yamasombi i tok klia olsem nius i raun long sosel midia olsem Polis Komisina David Manning bai stap aninit long arest taim em i kam bek gen long wok em i giaman nius.

Mista Yamasombi i soim belhat bilong en long ol dispela toktok i kamap long sosel midia na em i tok dispela tok i no tru na ol sampela lain wantaim tingting nogut i kamapim ol dispela kain toktok long bagarapim gutpela piksa bilong Polis Fos na ol lida bilong en.