Sif Ekseketiv Opisa bilong St John Ambulance Papua Niugini, Mathew Cannon i no amamas long ol pasin ol pipel long Mosbi Not Is na Mosbi Saut i mekim long ol embulens bilong St John Ambulance Papua Niugini long nait bilong niu yia.

Long nait bipo long nupela yia i kamap, ol sampela spakman long Mosbi Saut na Mosbi Not Is eria i tromoi ston long St John Ambulance taim embulens i ron i go long sevim laip bilong sampela lain husat i bin nidim helpim. Wanpela bilong ol dispela ston i go paitim wanpela opisa insait na opisa i kisim bikpela bagarap.

Ol Fox Yunit bilong Royal Papua Niugini Konstabulari i kam kamap long dispela hap kwik taim tru bihain long ol i kisim toksave na stopim ol dispela bikhet pasin. Ol i bringim dispela opisa husat i kisim bagarap i go long haus sik kwik taim.

Komisina Cannon i tok tenkyu long Fox Yunit bilong RPNGC long helpim bilong ol.

Maski wanpela opisa bilong ol i go long haus sik long dispela nait, St John Ambulance i no pasim wok, nogat, ol i mekim wok yet na ol i bin sevim laip bilong wanpela bebi we i no redi long karim long Sentral provins.

Komisina Cannon i amamas tru long gutpela wok ol tim bilong en i mekim long dispela nait long sevim laip maski birua i bin bungim ol.

Rebecca Negere i raitim