GAVMAN bilong Praim Minista James Marape i stap strong yet.

Dispela i kamap ples klia long stat bilong las mun taim palamen i bung.

Palamen i kirap long 16 Desemba kibung na suruk i go long 20 Epril, 2021 long em bai bung gen.

Bai i nogat Vot i Nogat Bilip (VONC) na Oposisen kendidet bilong Praim Minista, Patrick Pruaitch husat i bin redi long salensim Marape long sia bilong praim minista i lus.

Wantaim dispela palamen i bin tok orait tu long K19.6 bilien Mani Plen bilong 2021.

Dispela em bihain long 18 memba bilong palamen husat i bin lusim gavman na i bin go bung wantaim Oposisen tasol i lusim Oposisen na i go join wantaim gavman gen.

Dispela pasin bilong ol Memba i kalap i go kam long wanpela sait na go long narapela sait i givim hevi long kantri.

Planti ol lida na ogenaisesen i no bin amamas long kain pasin bilong ol Memba.

Em i kisim klostu wanpela mun olgeta, stat long 13 Novemba i go long 16 Desemba long painimaut sapos Marape Gavman inap stap strong.

Long taim dispela hevi i stap, sampela Memba husat pastaim i bin lusim gavman na i go joinim Oposisen i go bek long gavman.

Namel long ol em pastaim Deputi Praim Minista na Memba bilong Bulolo, Sam Basil, Sir John Pundari husat i Memba bilong Kompiam-Ambum, Nick Kuman husat pastaim i Minista bilong Haia Edukesen (Gumine), Wesley Nukundj husat pastaim i Minista bilong Imigresen na Boda Sekyuriti (Dei), Joseph Yopyyopy (Edukesen) Memba bilong Wosera Gawi, Gavana bilong Madang Peter Yama, Chris Nangoi (Sumkar) husat pastaim i Minista bilong Koreksinel Sevis; Gavana bilong Wes Nu Briten na pastaim Minista bilong Pablik Entraprais, Sasindran Muthuvel, Kevin Isifu (Wewak) na Douglas Tomurieasa (Kiriwina- Goodenough).

Basil i kisim bek sia olsem Deputi Praim Minista.

Bihain long dispela Marape i makim nupela kebinet bilong em.

Nupela kebinet bilong Marape:

Dispela i nupela kebinet bihainim ol senis i kamap:

• James Marape, Praim Minista na Minista bilong Bogenvil;
• Sam Basil, Deputi Praim Minista na Minista bilong Komes na Indastri;
• Ian Ling-Stuckey Minista bilong Treseri;
• Rainbo Paita, Minista bilong Nesenel Plening;
• Sir John Pundari, Minista bilong Fainens;
• Jelta Wong, Minista bilong Helt na HIV/AIDS;
• Kerenga Kua, Minista bilong Petrolium;
• Johnson Tuke, Minista bilong Maining;
• William Duma, Minista bilong Stet “Own” Entaprais;
• Michael Nali, Minista bilong Woks na Implementesen;
• Wera Mori, Minista bilong Envairomen na Konsevesen;
• William Samb, Minista bilong Transpot na Infrastraksa;
• Timothy Masiu, Minista bilong Infomesen na Komyunikesen;
• Soroi Eoe, Minista bilong Foren Afeas;
• Solan Mirisim, Minista bilong Difens;
• Wake Goi, Minista bilong Komyuniti Divelopmen;
• Isi Leonard Henry, Minista bilong Turisim, At na Kalsa;
• Dokta Lino Tom, Minista bilong Fiseris na Marin Risos;
• Westley Raminai, Minista bilong Haia Edukesen, Risets, Saiens na Teknoloji;
• Justin Tkatchenko, Minista bilong Hausing na Eben Divelopmen;
• Pila Niningi, Minista bilong Provinsal Afeas na Intagavman Rilesen;
• John Simon, Minista bilong Egrikalsa;
• John Rosso, Minista bilong Graun,
• John Sungi, Minista bilong Pablik Sevis;
• Wesley Nukundji, Minista bilong Imigresen na Boda Sekyuriti;
• Saki Soloma, Minista bilong Eneji;
• Jimmy Uguro, Minista bilong Edukesen;
• William Onguglo, Minista bilong Polis;
• Bryan Kramer, Minista bilong Jastis na Atoni Jeneral;
• Tomait Kapili, Minista bilong Leba na Indastriel Rilesen; na
• Walter Schnaubelt, Minista bilong Diwai o Forestri;
• Sekei Agisa, Minista bilong Sivil Eviesen.

Palamen kamapim Nesenel Pandemik Lo

Palamen i kamapim Nesenel Pandemik Ekt (NPE) o Lo long kibung bilong en long Jun long banisim kantri long kamap bilong coronavirus (COVID-19).

Dispela em bihain long planti Memba bilong Palamen i tok pait long Bil we sampela i tok ol i sapotim na sampela i tok nogat.

Inap long 70 i vot long Bil long em i kamap lo na 14 i tok nogat.

Allan Bird, Is Sepik Gavana i wanpela Memba long Gavman sait namel long ol Memba bilong Oposisen husat i tok gavman i mas givim moa taim long skelim ol toktok i stap insait long dispela Bil bipo long ol i ken sapotim.

Ol i no laik long sapotim bikos ol i tok planti ol toktok i stap long Bil i pasim humen rait bilong ol manmeri long mekim ol samting na dispela i bagarapim sosio-ikonomik laip bilong ol.

Tasol Minista bilong Helt, Jelta Wong husat i tokaut long dispela Bil i tok dispela Bil i bilong surukim yet wok bilong gavman long banisim kantri long sik coronavirus (COVID-19) long i no ken kam insait long kantri.

Dispela em bihain long de bilong Stet ov Imejensi (SOE) we gavman i kamapim pinis long long Jun yet.

Wong long dispela taim i tok kantri i gat tasol long 241 Intensiv Kea Yunit (ICU) bet, 40 ventileta, no gat gutpela save manmeri bilong lukautim ol lain husat sapos i kisim COVID-19 na i gat olsem 8 milien manmeri na dispela i bikpela salens long helt sistem.

Wantaim NPE, manmeri bai bihainim “New Normal” wei bilong stap.

Paul Zuvani i raitim