WANPELA Memba bilong Palamen i dai long 2020.

Dispela em Sir Mekere Morauta, Memba bilong Mosbi Not Wes.

Em i bin dai long 19 Desemba long wanpela haus sik long Brisben, Australia.

Em i bin sik sampela taim na i go stap long haus sik long Brisben.

Ol i holim lotu bilong em long Trinde 23 Desemba long  St Mary’s Anglikan Sios, Kangaroo Poin, Brisben, Australia.

Sir Rabbie Namaliu na Sir John Kaputin em tupela bikpela man tasol long Papua Niugini husat i bin stap insait long lotu bilong em.

Bikos long hevi bilong coronavirus (COVID-19) planti lida manmeri i no inap go long Australia.

Moa yet, famili i no inap kamapim wanpela haus krai long Pot Mosbi tasol i lukluk long holim memorial lotu long Mosbi sampela taim stat long 2021.

Planti manmeri na ol ogenaisesen i salim tok sori bilong ol long famili bilong Sir Mekere. Namel long ol em Praim Minista James Marape, Oposisen lida Belden Namah, Gavana Jeneral Sir Bob Dadae, papa bilong kantri, Gren Sif Sir Michael Somare na Gavana bilong Nu Ailan, Sir Julius Chan.

“Sir Mekere i kamapim ol polisi long strongim pablik sevis na ikonomi,” Marape i tok.

“Bikos long ol gutpela wok, kantri bai i no inap lus tingting long em.”

Namah husat i palamenteri lida bilong PNG Pati em Sir Mekere i statim.

Sir Mekere i kamap praim minista long 1999 long taim ikonomi bilong kantri klostu i bagarap tru.

Tasol wantaim ol gutpela senis em i kamapim, dispela i lukim kantri i strong gen.

Sir Mekere i bilong Kukipi, Malalaua long Galp Provins na i dai taim em i gat 74 krismas.