Gavana bilong Morobe Ginson Goheyuc Saonu i laik tok sori long Lady Roslyn Morauta na pikinini man James Morauta na famili bilong Sir Mekere Morauta husat i dai las wik.

Sir Mekere Morauta em i bin kamap Praim Minista na lukautim Papua Niugini long yia 1999 i go long 2001.

Em i bin stap long 4-pela tem bilong palamen na long bipo em i bin wanpela bikpela bisnis man, edministreta,  Ikonomis na komyuniti lida.

Gavana Saonu i bin stap Minista bilong Hausing aninit long lidasip bilong leit Sir Morauta long 1999 – 2002 we em i bin kisim bikpela senis i kam insait long Ikonomi bilong Papua Niugini.

Em i no man bilong toktok planti, em i save mekim wok stret.

Makim maus bilong meri bilong mi Merilyn Saonu na ol pikinini na ol wokman bilong Morobe Provinsel Gavman na Morobe Provins, mipela i mekim tok sori bilong mipela long lusim wanpela bikpela lida bilong Papua Niugini.

UPNG Jenelis Sumatin Martina Takaneng i raitim