Palamen i givim tok orait long Independen Komisin Egens Korapsen (ICAC) Bil long Novemba 12, 2020 wantaim 96 vot.

 Namel long ol vot, 16 memba long oposisen i bin bung wantaim 80 memba bilong Gavman long tok orait long dispela bikpela lo. Palamen i bin tok orait pinis long bil bilong Wisil Blowa Ekt we i nau kamap Ekt. Dispela lo i bai lukautim o banisim ol lain husat i ripotim kraim o korapsen na mekimsave long ol lain husat i no ripotim kraim o korapsen tasol ol i lukluk na larim ol dispela pasin go het na i no mekim wanpela samting o ol yet i wok long kamapim kraim o pasin korapsen taim ol i save yet olsem dispela em i rong.

“Mipela i putim ol wok bilong kraim long han bilong lo pinis na nau tok orait i kamap long ICAC i soim olsem hatwok mipela i mekim long kamapim opis bilong paitim korapsen bai karim kaikai klostu taim,” Praim Minista James Marape i tok.

Marape i tok dispela Institusenel Opis o opis aninit long lo bai stap longwe long ekseketiv han bilong gavman na komisina bilong dispela opis bai kisim rikrut long narapela hap. Dispela ICAC institusen bai gat pawa long pait egensim korapsen na i no inap long pret o wansait na olgeta ejensi bilong gavman olsem Polis, Ombudsmen, Pablik Prosikuta na ol arapela bai helpim dispela opis.

Rebecca Negere i raitim