Long Is Nu Briten, 11 kalabus i ranowe long Kerevat Haus Kalabus namel long hevi bilong COVID-19 na Komisina bilong Koreksenel Institusen Stephen Pokanis i tok dispela i kamap bikos ol Koreksenel Opisa i stap long wokmak long dispela taim i no bin was gut.

Na long Morobe Provins ol 47 kalabus i bin ranowe tu long Buimo haus kalabus long Ogas 2020. Long nau yet, Komisina Pokanis i tok ol i gat 5,200 kalabus manmeri long kantri na 108 bilong ol dispela lain i nau lusim kalabus na i stap aninit long sevis bilong parol. Ol i go bek long asples bilong ol tasol ol viles kot opisal bai putim ai long ol yet inap ol i pinisim olgeta krismas kot i makim long ol i bai sevim.

Atoni Jeneral na Seketeri bilong Dipatmen bilong Jastis Dokta Erik Kwa i tok i gat bikpela nid long apim mak bilong ol viles kot sistem na opisal long lukautim ol dispela 108 manmeri nau i stap long parol. Nupela Minista bilong Jastis, Bryan Kramer, na bipo Minista bilong Polis i tok viles kot sistem na opisal em i namba wan wokmak em i bai lukluk long en bihain long nupela yia.

Memba bilong Kandep, Alfred Manase i givim K400,000 long Dipatmen bilong Jastis long kamapim komyuniti jastis senta long Kandep distrik.

Nesenel Ekseketiv Kaunsil i luksave na tok orait long Join Fos Koles o skul bilong ol woda, ami na polis wantaim. Dispela koles i bin kamap pinis long 2016 na dispela yia em i lukim namba 3 greduesen na tu kisim luksave bilong NEC.

Rebecca Negere i raitim