Planti toktok i bin kamap long David Manning bihain long em i kamap Komisina bilong Polis long mun Disemba 2019. Em i namba 19 Polis Komisina na namba tu man long Is Nu Briten Provins long kisim dispela wokmak. Long mun Jun 2020, em i kisim narapela wokmak antap gen olsem Nesenel Pandemik Kontrola.

Aninit long lukaut bilong Komisina na Kontrola Manning, em i rausim planti ol bikhet polis opisa long wok bihain long em i givim tok orait na telefon namba long pablik i ken ring na tokaut long ol asua bilong ol polis. Long wankain taim, 1,120 polis opisa long kantri i kisim promosen i go antap long narapela mak na renk long 2020.

Ol polis investigeta i bin arestim na sasim Asisten Komisina bilong Polis Sylvester Kalaut bihain long tupela kaun bilong misapropriesen, wanpela kaun bilong abyus bilong opis na wanpela kaun bilong konspiresi long difraud.

Polis i bin painim wanpela bikpela drak koken o spak marasin long histri bilong PNG long Papa Lealea, Sentral Provins, long dispela yia. Komisina Manning i tok ol i painim 28 bek bilong spak marasin hevi bilong ol 750 kilogrem insait long wanpela liklik balus. Ol i bilip olsem dispela pasin i wok long kamap i stap long sampela taim na ol sampela bikman i go pas long dispela. Long dispela taim balus i bin hevi tru na i bin pundaun gen bihain long em i kirap na dispela i mekim na ol polis i bin luksave na holim ol. Polis i holim pinis olgeta 5-pela man husat i stap insait long dispela hevi. Tasol wok painimaut i stap yet.

Long mun Me, wanpela Polis Opisa, Sinia Inspekta Andrew Tovere, Suprintenden Operesen bilong NCD Polising Zon 3 i dai bihain long ol spak militari opisa i paitim em na givim bikpela bagarap long bodi bilong en.

Polis i bin holim Peter O’Neil long sas bilong misapropriesen, abyus bilong opis na korapsen long Jacksons ples balus taim em i kam long Australia wantaim famili bilong en.

Rebecca Negere i raitim