KRISMAS em i taim bilong promotim bel isi na long yuniti olgeta hap bilong laip bilong yumi, Sir John Kardinal Ribart, Asbisop bilong Pot Mosbi Asdaiosis i tok.

Em i tok long dispela taim yumi amamas long tingim Virgo Maria i karim pikinini bilong God na i stap namel long yumi, Emanuel, God i stap wantaim yumi.

Em i mekim dispela tok long Krismas toktok bilong em long dispela wik.

“Sapos yu yangpela o lapun, em wok bilong yumi long wok bung wantaim long lukim olsem bel isi i go insait long poroman pasin na wok bilong yumi,” Kardinal Ribat.

“Wantaim bilip, yumi strong na lukluk i go het wantaim save olsem God i no save lusim yumi.

Kardinal Ribat i tok long Edven Sisen yumi wokabaut wantaim bilip na hop long dispela taim God i promis long salim helpim i kam.

Dispela de nau i kamap olsem yumi tingim de Mama Maria i bin karim bebi Jisas.

Promis bilong God i givim bel isi na dispela bel isi em Jisas yet.

Kardinal Ribat i tok long stat bilong yia, yumi i bungim taim nogut bilong sik coronvirus (COVID-19).

Em i tok dispela sik i kamap long wol na long Papua Niugini tu.

Em i tok dispela sik i givim hevi long yumi long planti eria, long yumi olsem wan wan manmeri, famili, ples, komyuniti na sosio-politik-ikonomi.

Kardinal Ribat i tok planti taim, yumi i save painim yumi yet i stap long ol bikpela hevi we yumi i no save painim kaikai bilong famili o baim ol bil.

Yumi subim ol pikinini long stap long haus, olsem ol i no ken go long skul o pilai wantaim poroman bilong ol.

Em i tok bikos long hevi bilong COVID-19 sampela manmeri i lusim wok.

Em i tok dispela i mekim ol i no gat rot bilong bungim kost na long sapotim ol yet na famili bilong ol.

Em i tok yumi painim hat long save long ansa long taim ol senis na ol hevi i wok long kamap, long lo i kamap na stopim yumi long wokabaut bilong yumi olsem sik i no ken kalap i go long narapela.

Yumi i wok long mekim ol askim olsem, “Wanem samting i wok long kamap?”, “Wanem taim dispela sik bai pinis?”, “Dispela em trupela sik o samting man yet i kamapim?”Kardinal Ribat i tok.

“Yumi laik save wanem samting i tru na long painim gutpela ples bilong stap na planti moa ol kain askim olsem.

Wantaim dispela hevi, ol arapela samting tu i kamap na givim moa hevi.

Kardinal Ribat i tok maski long dispela ol hevi, yumi save God i stap wantaim yumi olgeta taim.

Em i tok long Krismas yumi i ken tok: “Emanuel, God i stap wantaim yumi,” (Matyu 1:23).

… lukim olgeta toktok long pes 13