KUMUL Petrolium Akademi (KPA) save trenim na givim gutpela skul toktok long o lhumen risos bilong Papua Niugini wantaim wol klas edukesen na ol teknikel kwalifikesen na painim wok bilong ol sumatin taim ol i greduet long institusen, wanpela opisa (official) i tok.

Menejing Dairekta bilong Kumul Petrolium Holdings Limited (KPHL), Wapu Sonk i mekim dispela toktok long namba tri greduesen seremoni bilong KPA institusen long Idubada Teknikal Koles long Pot Mosbi las wik.

Inap long 19 sumatin KPHL na Oil Search Limited sponsorim long greduet.

Sonk i tok KPA skul i gat wol klas trening fesiliti we ol sumatin trening long hap i save lainim ol samting olsem hap bilong ol ikwipmen na masin we ol kampani long oil na gas indastri sekta i yusim long ol plent long ol projek ples bilong ol.

Em i tok institusen tu i save kisim ol trena husat i gat bikpela teknikel save long trenim ol wok manmeri bilong oil na gas indastri sekta insait long ol biknem kantri.

Ol bikpela kantri olsem Amerika i save kamapim tu ol oil na gas projek.

Papua Niugini i gat ExxonMobil gas na Kutubu oil.

“Kumul Petrolium (KPHL) i yusim US$4 milien dola (K12 milien long sanapim dispela trening fesiliti.

Dispela fesiliti tu ol i konektim wantaim ol sistem wankain olsem yu lukim long Kutubu, Moro, Gobe,na Hides plent sait.

“Ol sistem i luk wankain na yu ken gat wankain pilim.

“Long  hia mipela trenim ol sumatin bilong mipela long ol i mas strongpela tingting long mekim wok.

“Ol sumatin i lainim gutpela pasin na redim ol yet long go stret long wok.

“Wantaim dispela trening mi kisim long ol indastri em bikpela samting na mi lain gut.

“Dispela i wanpela bikpela senis mipela i kisim long laip bikos pastaim mipela i no save liklik long wanpela samting tasol nau mipela i save long kain senis oil na gas indastri i ken mekim long laip bilong mipela.

“Dispela i helpim mipela long painim gutpela wok tu long ol arapela sekta.”

 Willie Brul i raitim