OL pipel long Hela Provins i bin amamas tru long selebretim namba wan Komo Kalsa Festival i bin kamap long Fonde 17 Desemba long Komo Distrik.

Planti manmeri long Hailans rijon i bin kamap long dispela de. Ol i putim ol naispela bilas tumbuna bilong ol na ol i singsing na danis long selebretim dispela namba wan kalsa festival.

“Planti ol manmeri long Hela i holimpas yet pasin tumbuna. Na ol i save gat bikpela laik long kalsa festival, olsem na mi bin askim Nesenel Kalsa Komisin long givim tok orait long mipela i ken ranim Komo Festival we yupela i lukim i kamap nau,” Presiden bilong Komo Kalsa Festival Charles Haluya i tok.

Em i tok moa olsem, Komo Kalsa Festival i rejista na i kisim setifiket pinis long Nesenel Kalsa Komisin. Na tu em i gat benk akaun pinis.

Ol narapela Provins long Hailans rijon tu i bin kamap long dispela kalsa festival. Ol i kam long Jiwaka, Goroka, Kutubu na Westen Hailans Provins.

Festival i bin kamap long nupela ragbi lig fil we ExxonMobil i bin wokim long Komo distrik na i ran long Fonde, Fraide na Sarere.

Ragbi lig tu em narapela samting we i kamapim bikpela senis long Komo.

Dispela em ol nupela divelopmen we i kamap long Hela provins na i daunim pasin bilong pait namel long ol traib.

“Mipela i tok tenkyu long ExxonMobil long bikpela wok em mekim long ol pipel long Hela. Kampani i bringim bikpela senis na i opim ai bilong ol pipel. Ol mangi nau i no tingim moa pasin bilong pait. Ol i amamas tasol long pilai ragbi,” Deputi Presiden bilong Ragbi Lig, John Karape i tok.

Carolyne Ketsimur i raitim